"Ўйин ҳақида нима десам бўлади, бошида иккита гол урганимиздан сўнг йигитлар бўшашишди. Футболда ҳар қандай вазиятга тайёр туриш керак. Иккита гол урдик дегани ғалаба қозонишимизни англатмасди. "Зомин" эса ўйинни кучайтирди ва иккита тўп киритди",- дейди Абдусамад Дўрмонов.

- Жамоа бугун қарши ҳужумларда ҳаракат қилди. Иккита голдан сўнг эса хотиржамликка берилди. Ўтказиб юборилган иккита голга нимани сабаб сифатида кўрсата оласиз?
- Қайсидир маънода бу икки гол ёрдам берди. Кўрдинглар, ҳисоб 2:0 пайтида йигитлар бўшашишди. Биринчиси пенальтидан, иккинчи гол дарҳақиқат ажойиб чиқди. Бундай жамоалар билан ўйинлар ҳар доим жуда қийин ўтишини йигитларга тушунтирган эдик.

- 14-турдан сўнг Про лига баҳслари икки гуруҳга бўлинган ҳолда давом эттирилади. Сизни бунга муносабатингиз қандай?
- Бу қарор бошида қабул қилинган эди. Ўтган мавсумда Про лигада саккизта жамоа тўртта давра ўйнаганди. Пандемия сабаб кўп нарса ўзгариб кетди, видеоконференцияда икки давра ўйнаб, тўрттадан икки гуруҳга бўлиниш таклифи билдирилди. Биринчи минимал вазифа кучли тўртликка кириш эди. Энди тўртта жамоа ичида юқори ўринлар учун курашамиз. Бунда ҳар бир учрашув финал ҳисобланади. Йигитларга ишонамиз. Меҳнат қилган ҳолда вазифани бажаришга ҳаракат қиламиз.

Абдусамад Дўрмонов: "Бундай жамоалар билан ўйинлар ҳар доим қийин ўтган"