- Абдусамад ака, сизни ўз лавозимингиздан истеъфога чиққанингиз ҳақида эшитдик. Бу ҳақда нима дейсиз?
- Ҳа, 2-3 кун бўлди бунга. Вазият шундай бўлиб қолди. Мураббийнинг қисмати шундай. Бугун кимгадир кераксан, эртага эса аксинча. Буни яхши тушунаман ва оддий хол сифатида қарайман.

- Бу йил биринчи лигада дебют мавсумини ўтказаётган “Ёзёвон-Лочинлари” жамоаси таркибини асосан маҳаллий футболчилар эвазига шакллантирган бўлсангизда, иккинчи босқич йўлланмасини қўлга киритдинглар. Аммо эндиликда ишдан кетяпсиз. Бу кимнинг қарори?
- Раҳбариятни. Улар шундай қарорга келди. Буни ўзига яраша сабаблари бор албатта. Лекин энди уларни ҳозир айтишдан наф йўқ деб ўйлайман. Жамоага омад тилайман.

- “Ёзёвон-Лочинлари”даги фаолиятингиздан қониқиш хосил қилдингизми?
- Албатта. Назаримда у ерда ёмон ишламадим. Маҳаллий ёшларга эътибор қаратган холда, уларни катта футбол ҳавосига мослаштириб бордик. Тажриба барибир йўқлиги билиниб турди. Аммо уларнинг келажаги порлоқ. Асосийси илк мавсумда олдимизга қўйилган вазифани бажара олдик. Тўғриси бу жамоага яхши ниятлар билан келгандим ва ўзимга яраша мқсадларим бор эди. Лекин афсуски кутилмаганда, истеъфога чиқишга мажбур бўлдим.

- Энди келгуси режалар қандай?
- Ҳозирча уйдаман. Фаолияти давомида йўл қўйган хато ва камчиликларимни таҳлил қиляпман. Балки энди бирор бир клубдан таклиф бўлса, кўриб чиқарман. Буни вақт кўрсатади.

Исломбек Рустамбеков суҳбатлашди.

Абдусамад Дўрмонов: “Мураббийнинг қисмати шундай”