Энди буни мақола деб бўлмайди. Шунчаки карантин пайтида мияга келиб қолган бир фикр. Тасаввур қилинг, сайтимиз ходимлари футболчи бўлганида кимга ўхшашарди. Қуйида "СА" вакилларининг характери ва ўзини тутишидан келиб чиқиб қайси футболчига ўхшашини келтириб ўтамиз.

Камолиддин Алимов - Сол Кэмпбелл

"Арсенал"да ўйнаган Сол Кэмпбеллни яхши эсласангиз керак. Марказий ҳимоячи эди. Англия терма жамоасида ҳам узоқ йиллар тўп тепган. Камолиддин Алимов характери жиҳатдан шу футболчига ўхшаб кетади: гавдали, оғир-босиқ ва вазмин.

Нарзулла Сайдуллаев - Габор Кирай

Венгриялик дарвозабон Габор Кирай 43 ёшида фаолиятини тугатди. У Евро-2016 пайтида 42 ёш бўлиб, мусобақанинг энг фахрий футболчиси бўлганди. Нарзулла ҳам ушбу дарвозабонга ўхшаб кўп йиллар сайт учун ишлашни мақсад қилган.

Шаҳбоз Беғамов - Штефан Эффенберг

Беғамовнинг турган битгани немис. Ўз пайтида "Бавария" етакчиси ва сардори бўлган Эффенбергга ўхшаб кетади. Бир қарасанг жим туради, бир қарасанг жаҳли чиқиб "портлайди". Эффенберг ҳам ўз пайтида шунақа характерли футболчи эди.

Толибжон Қосимов - Раҳим Стерлинг

Толибжон ҳам Стерлинга ўхшаб қора мағиздан келган, бўйи кичик, лекин чайир йигит. Иш кунлари ҳатто Зангиотадан эринмай пиёда келади. Жуда абжир ва ҳаракатчан. Бир жойда ушлаб ўтириш қийин. Футбол ўйнаганда оёқ тагида кўп ўралашади.

Зоир Турсунбоев - Майкл Каррик

Видео тасвирчимиз Зоир Турсунбоев камгап, беозор ва жимгина ўз ишини қиладиган йигит. Бу томонлама Майкл Каррикка ўхшаб кетади. Балки офисга келгани ҳам билинмас, лекин катта ҳажмдаги ишни бажаради. Каррик ҳам ўйинчилик пайтида кўп кўзга ташланмасди.

Нодирхўжа Юлдашев - Луис Энрике

Сайт директори Нодирхўжа Юлдашев сайтимиз шу даражага чиқишида жуда кўп меҳнат қилди. У худди футболчи ва мураббий Луис Энрикега ўхшаб ишлайди. "Барса"да 21-рақамда ўйнаган Энрике ёдингиздами? Жамоани ортидан эргаштиришни биладиган футболчи эди.

Азиз Нурий - Антонио Валенсия

МЮда тўп тепган эквадорлик Антонио Валенсия ўзимизнинг Нурийга ўхшаб кетади. Валенсия қарийб 10 йил "Манчестер Юнайтед"да ўйнаб атиги 17та гол урган экан. Азиз Нурий ҳам мақола ёзганида кам "гол урадиган" журналистлардан бири.

Жасур Асланов - Иван Ракитич

Иван Ракитич жуда одобли футболчи. Жасур Асланов ҳам камтарин ва одобли бола. Бир айтганингизни икки қилмайди. Мақола ёзишда эринмай маълумотларни ўрганиб чиқади. Тезроқ чиқарсам бўлди демайди. Бу томонлама унинг меҳнати Иван Ракитичникига ўхшаб кетади.

Азиз Тўхтамуродов - Эден Азар

Балки Эден Азар футболда Месси, Роналду эришган ютуқларга асло эриша олмас, лекин барибир ажойиб футболчи бўлиб қолаверади. Сайтимизнинг укаси "Оламспорт" етакчиларидан бири Азиз Тўхтамуродов ҳам бу жиҳатдан Азарга ўхшаб кетади. Ишдан умуман чарчамайдиган йигит.

Омонжон Тўхтамирзаев - Томас Гравесен

Омонжон ўзи "Реал"нинг ашаддий мухлиси. Сайтимизнинг русча версиясига масъул шахс. Шу боис уни бир пайтлар "Реал"да ўйнаган Томас Гравесенга ўхшатдим. Гравесен "Реал"да кўп ўйнамаган, атиги битта гол урган экан. Омонжон ҳам битта гол ургандир.

Жаҳон Файзуллаев (Петаш) - Людовик Жюли

"Монако"даги тиниб тинчимас Жюли эсингиздами? Ҳеч чарчамайдиган, охиригача югурадиган футболчи эди. Кейинчалик "Барса"да ҳам ўйнаган. Бизнинг Жаҳонгир мана шу футболчига ўхшаб кетади. Ишдан сира чарчамайди, фақат топшириқ берсангиз бас.

Абдулазиз Искандаров - Ян Коллер

Бўйи 2 метрдан узун футболчи бўларди: Ян Коллер. Абдулазиз ҳам катта бўлса худди Ян Коллердек бўлади. Ўзи 2001 йил туғилган, лекин бўй ҳам 190 бор-ов. Коллер "Боруссия Дортмунд"да ҳарқалай яхши ўйин кўрсатганди. Абдулазиздан ҳам шундай ижод кутиб қоламиз.

Гайрат Хасбиуллин - Лоран Блан

Бир сўз билан айтганда, босс. Сайт хўжайини ва сардори. 1998 йилги ЖЧда Франция терма жамоаси кубокни ютишида Лоран Бланнинг меҳнати қанча бўлса, сайт ривожига Гайрат Хасбиуллин ҳам шунча ҳисса қўшиб келяпти. 5-рақамда ўйнаган Лоран Блан жуда тартибли марказий ҳимоячи бўлган.

Алишер Остонов - Альваро Мората

Алишер Остонов "Атлетико" мухлиси. Характери ҳам Альваро Моратаникига ўхшаб кетади. Одобли йигит. Кўп гапирмайди ва ўзидан катталарга сакрамайди. Моратага ўхшаб кам гол уради, лекин бир урганда нишонга текказишга ҳаракат қилади.

P.S. Албатта, "Championat.asia" фақат шу журналистлардан иборат жамоа эмас. Сайтда жуда катта аудитория ишлайди. Бир қатор вилоят мухбирларимиз ҳам ёрдам бериб келишяпти. Фақат бу ўринда мен ўзим кўпроқ яқиндан билган инсонларга тўхталдим ва барча ўхшатишларни ўта шахсий деб қабул қилгайсиз.

Агар "CА" ходимлари футболчи бўлганида...