Гап шундаки ушбу турга қадар Равшан Ҳайдаров шогирдлари қаторасига 10та турдан бери ўз майдонларида ғалаба қозона олмаётганди. Ушбу учрашувда ғалаба тўпини Абдуқаҳҳор Ҳожиакбаров киритган бўлсада, дарвозабон Акбар Тўраев жамоасини муқаррар голлардан қутқариб қолди. Биз эса ўйиндан сўнг маҳоратли кипернинг фикрларига қулоқ тутдик.

"Сурхон"даги айни пайтдаги вазият ҳақида

Бутун дунёда пандемия ҳукум сурмоқда. Очколарни йўқотишимизда карантин катта рол ўйнади деб ўйлайман. Чунки, керакли паллада машғулотларни қила олмадик. Шунингдек мураббийлар алмашинуви ўз сўзини айтди десам тўғри бўлади. Кўрган бўлсангиз ҳеч бир баҳсда ўйин томонлама мағлуб бўлмадик. Қаердадир хатолар панд берди, яна қаердадир омад биздан очиқчасига юз ўгирди.

Маош ва қарздорликлар

Қарздорликлар секин-аста ижобий ҳал қилинишини раҳбариятимиз ваъда берди.

"Андижон" билан ўйиндаги ғалаба ҳақида

Ушбу ғалаба навбатдаги учрашувларда бизга катта мотивация беришига ишонаман.

Ўз майдонидаги ғалабасиз серия сабаби

Юқорида таъкидлаганимдек машғулотлар ўтказиш, жамоанинг жисмоний ҳолатини бир маромида ушлаб туриш қийин бўлди.

Акбар Тўраевнинг ўйинида нима учун барқарорсизлик юзага келди?

Жароҳатлар қийнаб юборди. Алам қиладиган жиҳати йўқ жойдан машғулотларда ҳам жароҳат орттириб олдим. Ҳозир ўзимни яхши ҳис қилмоқдаман. Худо хоҳласа аввалги мавқеимга қайтишга ҳаракат қиламан. Мақсадим миллий терма жамоага қайтиш. Ҳар бир ўйинда ғалаба учун майдонга чиқамиз. Кубокни қўлга киритиш зиммамизга юклатилган!

Абдулазиз Искандаров ёзиб олди.

Акбар Тўраев: "Андижон" устидан қозонилган ғалаба навбатдаги учрашувларда бизга катта мотивация беришига ишонаман"