Даставвал “Ал-Фатҳ” бош мураббийи сўз олди.

- Нуфузли мусобақа остонасида турибмиз. Саудия Арабистони чемпионатининг сўнгги турларида қониқарсиз натижалар қайд этдик. Энди бор эътиборимизни Осиё Чемпионлар лигаси баҳсларига қаратамиз. Мухлисларимиз ишончини айнан халқаро турнир орқали қайтаришга уриниб кўрамиз. Қўл остимда жуда маҳоратли футболчилардан ташкил топган аҳил жамоа бор. Улар билан катта ютуқларни қўлга киритиш мумкин.

“Бунёдкор” ҳақида билганларимиз шуки, улар мавсумолди йиғинлар давомида бир неча ўртоқлик учрашувлари ўтказишди. Ўтган мавсум бўйича Ўзбекистон чемпиони.

“Бунёдкор”нинг аксарият футболчилари бўйдор ва жисмонан бақувват саналишади. Бироқ бу бизни чўчитмайди. Чунки футбол ерда ва оёқларда ўйналади.

Об-ҳаво ҳарорати кўпроқ рақиб зарарига ишласа керак. Чунки Ўзбекистонда ҳозир қиш фасли ҳукмронлик қиляпти. Лекин бу ҳолати айтарли ташвиш туғдирмайди, - дейди Ал-Фатҳ бош мураббийи Фази Ал-Жабал.

Кейин "Ал-Фатҳ" сардори Ҳамдан Ал-Ҳамдан ўйинолди фикрларини билдириб ўтди.

- “Бунёдкор” кучли таркибга эга эканлигини яхши биламиз. Ҳар қандай ҳолатда ҳам уч очкони ўзимизда олиб қолишга ҳаракат қиламиз. Осиё Чемпионлар лигаси стартидаги ғалаба бизга жуда муҳим. Боиси агарда буни уддалай олсак, ишларимиз юришиб кетади, - дейди “Ал-Фатҳ” аъзоси Ҳамдан Ал-Ҳамдан.

Баҳодир МИРЗАЕВ
Ал-Ҳаса, Саудия Арабистони

"Ал-Фатҳ" бош мураббийи: "Футбол ерда ва оёқларда ўйналади"