Сабаби, “бургутлар” ўз тарихида илк бор Осиё Чемпионлар лигаси 2 да иштирок этади. Айтиш жоизки, ҳозирданоқ Андижонда ОЧЛ нафаси сезилмоқда. Жамоа нафақат ўз вилояти, балки Ўзбекистон шаънини халқаро майдонда ҳимоя қилади. Бунинг учун клубни янги мавсумга ҳар томонлама пухта тайёрлаш билан биргаликда Андижонда ОЧЛ ўйинларини ўтказиш ҳамда бундан мухлислар баҳраманд бўлишлари учун “Бобур арена” стадионини ҳар томонлама ОФК талабларига тўла-тўкис мос келтириш муҳим вазифалардан бири ҳисобланади.

ОЧЛ баҳсларини “Бобур арена”да ўтказиш ва Андижон аҳли буни ўз кўзлари билан кўришга ҳақлилар. Буни яхши ҳис қилиб турган вилоят ҳокимлиги ва клуб бош ҳомийси жамоани янги мавсумга ҳар жиҳатдан пухта тайёрлашга, шароитларни янада яхшироқ яратиб беришга киришган. Бунда эса албатта стадионда керакли реконструкция ишларини олиб бориш ҳам ўз ичига киради. Бунинг учун аллақачон реконструкция лойиҳаси ишлаб чиқилган.

Шу мақсадда бугун Андижонга ОФК расмийси қатарлик мутахассис Рашид Ал Доссари ташриф буюрди. Унга ЎФАнинг халқаро мусобақалар ва тадбирлар ўтказиш бўлими бошлиғи Муҳаммад Содиқ – Содиқ Охунов ҳамрохлик қилди. ОФК вакили “Бобур арена” стадиони билан яқиндан танишар экан, Андижон вилояти футбол ассоциацияси биринчи вице-президенти Бекзод Каримов ва “Андижон” клуби вакиллари тўлиқ маълумотлар билан ўртоқлашдилар. Шунингдек, реконструкция лойиҳаси ҳам атрофлича тушунтирилди. Барча иш ОФКнинг талаблари асосида олиб борилади. Унда майда деталларгача эътиборга олинган бўлиб, амалга ошириладиган реконструкция лойиҳаси Рашид Ал Доссарида илиқ таассурот қолдирди.

Бундан ташқари, ОФК вакили шаҳардаги энг нуфузли меҳмонхоналарни ҳам диққат билан кўздан кечирди. Чунки ОЧЛда Андижонга келадиган хориж клубларига яратиладиган шароитлар ҳам ОФКнинг талаблари асосида бўлиши лозим. Бу борада Ал Доссарига меҳмонхоналардаги шарт-шароитлар манзур келди. Биласиз, яқинда Андижонда футзал бўйича жаҳон чемпионатининг бир қисми муваффақиятли ўтказилди. Табиийки, меҳмонхоналар ва ундаги шароитлар бўйича мутлақо муаммо йўқ.

Шунингдек, Рашид Ал Доссари “Андижон” клубининг ҳозирги базасида ҳам бўлди. Машғулот учун майдонларни кўздан кечирди. Ҳозирда жамоамиз учун мутлақо янги, замонавий база барпо этилмоқда ва бу хусусида ҳам ОФК комиссарига маълумот берилди. Бир сўз билан айтганда, Ал Доссари “Андижон” футбол клубининг ОЧЛ ўйинларини ўзида қабул қилиши учун амалга ошириладиган барча ишлар билан яқиндан танишиб чиқди ва шаҳримизга қилган сафари унда ижобий таассурот қолдирди.

Тез орада “Бобур арена”да ОФК талаблари асосида лойиҳада кўрсатилган ишлар бошланади. Мутасадди раҳбарлар барчасини қатъий назорат олишган. Шундай экан, стадионда реконструкция ишлари ўз вақтида ва муваффақиятли бажарилишига асло шубҳа йўқ. Сиз билан биз 2025-йилда “Андижон”нинг ўз тарихида илк бор ОЧЛ беллашувларини “Бобур арена”да қабул қилишига гувоҳ бўламиз.

Андижон Чемпионлар Лигасига тайёргарликни бошлади