Вазирлар Маҳкамасининг 2021 йил 30 апрелдаги "Футбол клублари фаолияти самарадорлигини ошириш чора-тадбирлари тўғрисида"ги 261-сонли қароридан келиб чиқиб, Мусобақалар регламентига Суперлига ва Про лига клублари йиллик харажатлари сметасини ФИФА ҳамда ОФК талабларини инобатга олган ҳолда ЎФА билан келишиши масаласи киритилганди.

Футбол клубларига ажратилаётган маблағларнинг мақсадли сарфланишини мониторинг қилиш муҳим аҳамият касб этади. 2022 йилги мавсум олдидан клублар илк бор ўз сметасини келишиш учун ЎФАга тақдим этганди. Энди улар 2022 йилги сметадан ўрин олган маблағлар мақсадли сарф этилиши юзасидан комиссия суҳбатида бўлади.

Шу мақсадда клублар бирма-бир йиллик бюджет сметасини махсус комиссия олдида ҳимоя қилиб чиқмоқда. Бунгача бир қатор жамоалар бу ишни бажарган бўлса, энди навбат “Андижон” жамоасига ҳам етиб келди.

Клуб бош директори Улуғбек Мирзаев куни кеча ЎФАда ташкил этилган махсус комиссия суҳбатида бўлиб, жамоанинг йиллик бюджетини йил давомида қандай тақсимланиши юзасидан муваффақиятли ҳимоя қилди.

Қайд этилишича, “Андижон” клубининг йиллик сметасидан асосий жамоа, U-21, U-19, аёллар ва футзал жамоалари, шунингдек, администрация, хизмат кўрсатувчи персоналлар каби 7 та бўғин жой олган. Улар учун ойма-ой харажатлар қандай тақсимланиши алоҳида кўрсатиб ўтилди. Қолаверса, стадион майдонини яхшилаш, “прожектор” масаласи бўйича ҳам маблағларнинг ўринли сарфланиши рақамларда келтириб ўтилган.

ЎФА комиссияси томонидан "Андижон" футбол клубининг сметаси маъқулланди.

"Андижон" клуби сметаси ЎФА томонидан маъқулланди