Бўлажак учрашувга жамоамиз имкон қадар пухта ҳозирлик кўришга харакат қилди.

Айтиш керакки, бугун жамоамиз делегацияси Қарши шаҳрига етиб келди ва шаҳардаги муҳташам “Sarbon” меҳмонхонасига жойлашди. Қарши шаҳрида айни дамда об-ҳаво яхши деса бўлади. Тунда ёғиб ўтган ёмғирдан сўнг, бугун қуёш чарақлаб чиқиб турибди. Ўтган ўйинларда жарохати сабаб жамоага ёрдам бера олмаган икки марказий ҳимоячи - Дилшод Жўраев билан Павел Смоляченко яна сафга қайтгани мухлисларимизни қувонтирса керак. Улар бугун жамоамиз билан бирга Қаршига етиб келди. Бўлажак учрашув олдидан ҳам таркибда бир мунча йўқотишлар мавжуд бўлиб, марказий ҳимоячи Жавлон Гусейнов сариқ карточкалари сони 4тага етгани боис “Шўртан”га қарши ўйинни ўтказиб юборади. Иқтидорли ҳужумчи Алишер Абдувоҳидов машғулот чоғида кутилмаганда жарохатга йўлиқиб, сафдан чиқди. Шунингдек яна бир нечта ўйинчиларимиз жамоа билан бирга Қаршига етиб келмаган. Бу ҳақда кейинроқ маълумот берамиз.

Бугун ёшлар жамоамиз тушликдан сўнг Ғузор шаҳри томон йўл олади ва “Шўртан” ўринбосарларига қарши баҳс олиб боради. Айтиш керакки, бугун ёшларимиз сафарда ғалаба қозонса турнир жадвалида 7-ўриндан 5-ўринга кўтарилиш имкониятига эгадир. Буни айни дамда ёшларимиз ҳам жуда яхши тушуниб турибди. Шундай экан улардан омадсиз юришга чек қўйишларини кутиб қоламиз.

Эслатиб ўтамиз, ёшлар лигаси баҳси бугун соат 15:00да старт олади. Эртага эса олий лига учрашуви соат 17:00да бошланиши режалаштирилган.

Андижон матбуот-хизмати

“Андижон”: “Шўртан”га қарши ўйин олдидан