“Бургутлар”нинг декабрь ойидаги дастлабки йиғини бир ҳафтадан иборат бўлганди. Янги йил байрами муносабати билан футболчиларга қисқа муддатли дам берилганди ва жамоа 5 январдан яна машғулотларга киришди. Айтиш керакки, “Андижон” жамоаси янги йилни ўзгаришлар билан бошлади.

“Андижон” клуби бош директори лавозимида фаолият олиб борган Шуҳрат Ўринбоев ўз аризасига биноан истеъфога чиқди. Унинг ўрнига ёш ва умидли мутахассис Бекзод Каримов “Андижон” жамоаси бош директори этиб тайинланди. Бунгача Бекзод Каримов Андижон вилояти футбол федерацияси биринчи вице-президенти лавозимида ишлаб келаётганди. Бу йилдан жамоага Каримов раҳбарлик қилади. “Андижон” жамоаси мураббийлар штабида ҳозирча ўзгаришлар йўқ. Ўтган мавсумнинг иккинчи ярмида бош мураббийлик вазифасини олган Сергей Ковшов 5 январь куни Тошкентга Андижонга келиб яна ишга киришди. Шунингдек, катта мураббий Нозим Муллаохунов ўз ишини давом эттирмоқда. Ёрдамчи мураббийи Виталий Легай эса биринчи кунги машғулотда кўрингани йўқ. Дарвозабонлар билан ишлаш учун Ҳамиджон Зокиров таклиф этилди.

5 январь куни футболчилар клуб қароргоҳига йиғилиб, Сергей Ковшов қўл остида машғулотларни бошлашди. Йиғиннинг биринчи куни бўлгани боис “Соғлом авлод” стадионида футболчилар тикланиш машғулотини ўтказишди. Унда 20 нафардан ортиқ футболчи иштирок этди. Лочин Долимов, Асрор Раҳмонов, Турсунбой Хусанов, Шукур Жумабоев, Фарҳод Бекмуродов, Алишер Тўхтасинов, Жавлон Гусейнов, Бекзод Ғозиев, Шаҳбоз Жумабоев, Даврон Жўрақулов, Фарруҳ Мирзаев ва “УзДонгЖу” жамоасидан таклиф этилган бир нечта ёшлар биринчи кунги машғулотларда иштирок этишди. Иброҳим Отахонов эртадан бошлаб машғулотларга қўшиладиган бўлса, Анвар Бердиев ва Иқбол Бобохонов пайшанба куни жамоа билан шуғулланишни бошлашади. Бундан ташқари, йиғиннинг биринчи кунида янги ўйинчилардан, “Навбаҳор”дан келган дарвозабон Хуршид Хўжаев билан ҳимоячи Бобир Акбаров ва “Машъал” жамоасидан ташриф буюрган Сирожиддин Аллаев таркибда пайдо бўлишди. Аммо уларнинг орасида Акбаров машғулотларда фақат бир кун қатнашди холос. Эртага футболчилар Андижон шаҳрида дастлабки тиббий кўрикдан ўтадилар. Андижонда олиб борилаётган иккинчи йиғинда жамоа сафига бир қатор янги ўйинчиларни келиб қўшилиши кутилмоқда.

“Андижон” клуби матбуот хизмати

"Андижон": Хуршид Хўжаев ва Сирожиддин Аллаев келди