Жамоа жойлашган қароргоҳда ҳамма шароитлар муҳайё бўлиб, барча эътибор фақат машғулотларга қаратилган.

Маълумот учун шуни ҳам қўшимча қилиб ўтишим керакки, бу ерда қиличбозлар, оғир атлетикачи, боксчилардан иборат Ўзбекистон терма жамоаси вакиллари ҳам ўз йиғинларини ўтказишади. Шундан ҳам билиш мумкинки, шароитлар ва шуғулланиш учун мўлжалланган спорт иншоотлари аъло даражада.

"Андижон" кунига икки маҳалдан машғулотлар ўтказяпти. Кеча куннинг биринчи ярмида бош мураббий футболчиларни ёпиқ манежда турли хил қизиқарли машқлар ёрдамида шуғуллантирди. Кечки пайтдаги машғулот эса стадион ҳудудида бўлиб ўтди.

Мухлисларимизни таркибга янги қўшилаётган футболчилар қизиқтириши шубҳасиз. Бу сафар улар учун янгилик сифатида шуни маълум қила оламизки, кеча жамоа сафига иқтидорли ҳужумчи Бобур Фарҳодов қўшилди. 27 ёшли футболчи 2022 йилги чемпионатда “Сўғдиёна” ҳамда “Металлург” клубларида тўп тепган.

Бундан ташқари, ўтган йилги мавсум бўйича "Андижон"нинг энг яхши футболчиси сифатида эътироф этилган Илдар Маматказин ҳам клуб ихтиёрига етиб борди.

"Андижон" йиғинига икки нафар футболчи қўшилди