Тўғриси, Андижон вилоятининг асосий жамоаси у қадар кучли бўлмасада, ҳудудларда маҳалла футболи ҳавас қиладиган даражада ривожланган. Туманлардаги мавжуд мини-стадионлар доим гавжум.

Вилоят мутасаддилари аҳолининг энг севимли спорти тури - футболни кенг тарғиб қилиш, асосийси - қишлоқ ёшлари ичидан энг иқтидорли спортчиларни танлаб олиш учун мавжуд 878 та маҳалла жамоалари ўртасида нуфузли мусобақа уюштирди.

18 ёшдан 30 ёшгача бўлган маҳаллий футболчилардан тузилган жамоалар 1 августдан бошлаб “Вилоят ҳокими Кубоги”да иштирокини бошладилар. Жамоалар биринчи босқични ўз секторларида ўтказиб, иккинчи босқич туман биринчилигига йўл олади. Ўз туманида ғолиб бўлган жамоалар вилоят босқичида тўп суради.

“Оддийгина маҳалла йигитлари ичида келажаги порлоқ футболчиларни кашф қиляпмиз. Мазкур мусобақа, янги иқтидорларни танитиш билан биргаликда, ёшлар ўртасида футболни оммавийлигини янада оширишга ёрдам беради”,-дейди вилоят футбол ассоциацияси биринчи вице-президенти Бекзодбек Каримов.

Мусобақанинг финал ўйини 22 август куни “Соғлом авлод” стадионида бўлиб ўтади. Биринчи ўринни олган жамоа маҳалласига замонавий мини-стадион қуриб берилади. Совриндор жамоаларга эса катта суммадаги спорт жиҳозлари топширилади.

Элмурод Эрматов, Андижон

Андижонда 878та маҳалла жамоалари қатнашаётган “Ҳоким Кубоги” мусобақаси ғолибига мини-стадион қуриб берилади