"Ўйиндан қониқдим. Бир ҳафтадаги учинчи ўйинни ўтказдик. Иккинчи таймни фаол бошладик, афсуски четлатиш барча режаларимизни бузиб юборди. Мана шундай ўйинлар кўпроқ бўлса яхши бўларди", - дейди Андрей Фёдоров.

- Бугун "Локомотив"нинг энг яхши ўйини бўлмади деб ўйлайман. Бугун икки очко йўқотилди деб ҳисоблайсизми?
- Таркибда йўқотишлар бор эди. Йигитларнинг кўпида чарчоқ борлиги учун ҳам ҳужумда вазиятлар камроқ бўлди.

- Учта фронтда кураш олиб бораётган "Локомотив" учун захира ўриндиғи тор эмасми?
- Балки тўғридир. Барча мураббий ҳам тенг кучли иккита таркибга эга бўлишни истайди. Аммо футболчилар келса улар ўйнаши ҳам керак, ҳозирги йигитлардан кучли бўлишлари ҳам лозим. Йил бошида ўзимиз истаган футболчиларни таркибга қўшиб олгандик.

"Ўйин жудаям қизиқ бўлди деб ўйлайман. Иккала жамоа ҳам ютиб кетиши мумкин эди. Яхши ўйин бўлди. Ўтган ўйинлардаги ҳаяжоннинг сабаби тажрибам камлигида эди, ОЧЛда дебют қилаяпман. Ўйиндан ўйинга тажриба тўплаб борамиз", - дейди ўйиннинг энг яхши футболчиси Жавоҳир Илёсов.

Андрей Фёдоров: "Исталган мураббий тенг кучли иккита таркибга эга бўлишни истайди"