Тошкентда туғилган Андрей Владимирович кеча "Олимпия" - "Динамо" учрашувини бевосита стадиондан кузатди. Учрашувдан сўнг унинг фикрларини тингладик.

"Самарқанднинг "Динамо" жамоаси бош мураббийи Вадим Абрамовдан чорлов бўлди. Биласиз, футбол сир-асрорларини Ўзбекистонда ўрганганман. Ўзбекистон менинг биринчи ватаним, футболчи сифатида "Пахтакор"да танилганман. Шу боис ватанга хурсандчилик билан қайтдим. Қаерга борсам ҳам Ўзбекистон меҳмондўст халқ эканлигини айтишдан чарчамайман. Ватанингда ишлашни таклиф қилишар экан нима учун йўқ дейишим керак? Чорловни мамнуният билан қабул қилдим.
Ўзбек футболидаги ютуқлар билан доим фахрланаман. Чемпионат, клублар билан доим қизиқиб боришимни айтишим керак. Шу кунларда Самарқандга йўл оламан. Инфратузилма билан танишаман. Албатта осон бўлмайди. Чунки ўтган йили ўринбосарлар жамоаси бўлмаган. Барчасини нолдан бошлашга тўғри келади.
Тошкентда бир нечта учрашувларни кузатишга муваффақ бўлдим. Болалар, ёшлар жамоалари ўйинларини кўрдим. Бу борада нима кераклигини биламан ва тажрибамдан келиб чиқиб ғалабаларга ҳиссамни қўшишга ҳаракат қиламан. Ўйлайманки, ҳаммаси яхши бўлади",- дейди Пятницкий

Абдулазиз Искандаров ёзиб олди

Андрей Пятницкий: "Шу кунларда Самарқандга йўл оламан ва инфратузилма билан танишаман"