"Жанговар дуранг гувоҳига айландик. Ғалабага яқин эдик, дея оламан. Оддий хатоларимиз эвазига дарвозамиздан иккита тўп олиб чиқдик. Жамоам гол уришга қийналди. "Арал Самали" ҳам мухлислари кўз ўнгида яхши ҳаракат қилди. Ишқибозларимиздан узур сўрайман. "Бухоро" дурангни ўйлаб эмас, ғалаба учун ҳаракат қилди. Иккинчи бўлимдаги ўйинни кўрсатсак олдимизга қўйилган мақсадга эришса бўлади".

- Стадиондаги муҳит ва майдон ҳақида фикрингиз қандай?
- Тўғриси бундай майдонда бирорта машғулот ўтказмаганмиз. Бунга ўзим ҳам қаршиман. Футболчилар эҳтиёт бўлиб шуғулланишди. Ушбу майдонда бир кун машғулот ўтказиб ўйинга чиқдик. Шунга қарамасдан шогирдларим иккинчи бўлимда кўрсатмаларни тўғри бажаришди. Олдинга қараб интилишимиз керак. Бу ўйин тарихга айланди.

- "Бухоро" бир очко қўлга киритдими ёки икки очко йўқотди?
- Иккинчи бўлимда кўплаб вазиятлар юзага келтирдик. Кўрган бўлсангиз бир вазиятда тўп дарвоза устунига тегди. "Бухоро" икки очко йўқотди.

- Ўйиннинг навбатдаги қисмида ёғишни бошлаган ёмғир қанчалик таъсир қилди?
- Иккита жамоа ҳам бир ҳил шароитда ўйнади. Ёмғир футболчиларга қийинчилик қилмади. Футболчиларни руҳий босимдан олиб чиқиб кетиш қийин бўляпти.

- Рақиб сафидаги қайси футболчиларни алоҳида кўрсатган бўлардингиз?
- "Арал Самали"нинг ҳужумчилари Наврўз Алимов ва Азамат Алланиёзовни яхши биламан. Ҳеч кимни ажратмоқчи эмасман. Агарда рақиб шундай шижоат билан ўйнаса кўп жамоаларга бош оғриқ бўлади.

- Футболчилик фаолиятингизни катта қисмини водийда ўтказгансиз. Мураббийликни ҳам Фарғонанинг "Истиқлол" жамоасида бошладингиз. Бошқа жамоада, муҳитда ишлаш қандай бўляпти?
- "Бухоро"да ёрдамчи сифатида иш бошлагандим. Лекин нима учун Даврон Файзиевни истеъфога чиқаришди билмайман. Клубдагилар яхши шароитлар яратиб беришяпти. Қашқадарё футболидан чиқиб водийда ўйнадим. Ҳаммаси тарихда қолди. Айни пайтда бор эътиборим "Бухоро" жамоасига қаратилган.

Анвар Бердиев: "Бундай майдонда ҳаттоки машғулот ўтказишга ҳам қаршиман"