Мазкур ўйинда фарғоналикларнинг афсонавий футболчиси Анвар Бердиев фаолиятидаги расмий 500-баҳсида иштирок этди. Шу вақтга қадар тажрибали ҳужумчи Ўзбекистон чемпионатларида 499 та учрашувда иштирок этганди.

Айтиш керакки, футболчи мазкур ўйинларнинг кўплаб қисмини қадрдон жамоаси бўлмиш, “Нефтчи” сафида ўтказган ҳамда ўзининг тўпурарлик салоҳияти, бектакрор ўйинлари билан нафақат фарғоналик, балки бутун ўзбекистонлик мухлисларнинг қалбидан ўчмас из қолдирди.

40 ёшли ҳужумчининг 500-баҳси “ўзбек эл-классикоси” ҳисобланмиш “Пахтакор”га қарши баҳсга тўғри келди. Ҳужумчи мазкур ўйинда заҳирадан майдонга тушди ва “Нефтчи” учун муҳим бўлган голга муаллифлик қилди. Ўйиндан сўнг стадионда футболчини жамоадошлари 500 рақами туширилган футболка билан табриклашди.

Фурсатдан фойдаланган ҳолда, “Нефтчи” ПФК раҳбарияти, мураббийлар штаби, футболчилар, ходимлар ва жамоа мухлислари номидан Анвар Бердиевни мазкур юбилей баҳси билан табриклаймиз!

“Нефтчи” матбуот хизмати.

Анвар Бердиев юбилей 500-баҳсини ўтказди