Ўйинда устунликни қўлига олган ва буни ҳисобда ҳам акс эттирган "шерлар" ҳақли тарзда ғалабани тантана қилди. Учрашувдан сўнг эса мезбонларнинг тажрибали ҳимоячиси Анзур Исмоиловнинг фикрлари билан қизиқдик.

"Бугун очиқ ва ҳужумкор ўйин бўлди. Икки жамоа ҳам футбол ўйнади. Тезкор гол уриб олдик. Стадионда барчаси аъло даражада, чим ҳолати ҳам яхши. Биз қатори "Бунёдкор" футболчилари ҳам ғалаба учун майдонга тушганди. Бугун рақибдан бир калла кучлироқ ўйнадик. Ўйин ташкил қилиш томонидан, вазиятлардан фойдаланиш борасида ҳам устунлик биз томонда бўлди. Жиззахда қийналгандик. Боиси майдонга шу куни сув сепилмаганди. Шунингдек ҳаво соат олтида ҳам иссиқ эди. Энди у мағлубиятга баҳона бўлолмайди. Ҳамма айб ўзимизда бўлди. "Бунёдкор"га тезкор гол уришимизни кутмагандик. "Пахтакор" ўзига ярашадиган биринчи ўринга қайтиши керак деб ўйлайман.

Кўрган бўлсангиз "Бунёдкор" ҳам ҳимояга ётиб олмади. Тўпни назорат қилди, ҳужумлар уюштирди. Биз шунчаки ўзимиз яратган вазиятларни гол билан тугатдик, холос. Ҳисоб йириклаша бошлагач ўйин назорати ҳам жамоамиз томонга ўта бошлади. Энди меҳмонларда ҳам голдан сўнг олдинга ўтишдан бошқа чора қолмаганди. Шунинг учун ҳимояси бузилиб кетди",- дейди Анзур Исмоилов.

Анзур Исмоилов: "Бугун "Пахтакор" "Бунёдкор"дан бир бош устун ўйнади"