26.12 17:30 (Тошкент вақти) "Тоттенхем" - "Брайтон"

Жозе Моуриньюнинг янги жамоасига таъсири тобора билиниб бормоқда. Масалан, кучли олтилик клубларига қарши ўйнаш нуқтаи назаридан бу сезилади.

Ўтган турда "Тоттенхем"нинг ўйини Соннинг четлатилиши билан эсда қолди. Моур ўз шогирдларини ўз майдонида ўтадиган ўйинга жиддий тайёрлагани аниқ. Ўйиннинг бошиданоқ жамоадан шиддатли ўйинни кутиш мумкин.

"Брайтон" тўп билан кўпроқ муомила қиладиган жамоа, бироқ улар меҳмонда ўйнашини унутмаслигимиз лозим. Ўтган турда жамоа ўз майдонида "Шеффилд"дан енгилди (0-1). Грем Поттер шогирдлари Лондонга жиддий ниятлар билан келади. Улар катта рақибларга қарши яхши ўйин кўрсатишларини ҳамма билади. Жумладан, "Ливерпуль", МЮ ва "Арсенал"га қарши учрашувлар бунга мисол бўла олади.

Ўйинга оид фактлар:

- "Тоттенхем" барча турнирларда ўз майдонида кечган "Брайтон"га қарши охирги 4та ўйиннинг ҳаммасида ютган.

- "Тоттенхем" ўз уйида барча мусобақалардаги "Брайтон"га қарши охирги 3 ўйинда гол ўтказмаган.

- Барча мусобақалардаги ўзаро кечган охирги 3 ўйинда камида 2,5 гол урилган.

Тахминий таркиблар

"Тоттенхем" (4-2-3-1): Гассанига, Орье, Алдервейрелд, Санчес, Роуз, Уинкс, Дайер, Алли, Сессеньон, Моура, Кейн

"Брайтон" (4-3-1-2): Райан, Монтойя, Уэбстер, Данк, Берн, Муй, Стивенс, Прёппер, Грос, Мопе, Коннолли

26.12 20:00 "Борнмут" - "Арсенал"

Ўйиннинг асосий интригаси Микель Артетанинг дебюти бўлади.

"Борнмут" охирги ўйинларда жуда оқсаяпти. Жамоанинг зарба беришдаги ва гол киритишдаги кўрсаткичи жуда паст. Шунга қарамай, улар ўз майдонида "тўпчилар"га муносиб қаршилик кўрсатадилар. Ажабланарли тарафи, жароҳатланган футболчилар "Арсенал"дан кўра "Борнмут"да кўпроқ. Вақт қисқа бўлса-да, Артета ҳам ўз жамоаси билан машғулотларда астойдил ишлашга ҳаракат қилди. Асосий вазифа – стабил ўйин ва палапартишликларга йўл қўймаслик екани маълум қилинди.

Бугун эҳтиёткорона, аммо чиройли ўйин бўлиши кутилмоқда.

Ўйинга оид фактлар:

- "Борнмут" Премьер-лига доирасидаги охирги 7 ўйиннинг 6тасида мағлубиятга учраган.

- "Арсенал" барча мусобақаларда "Борнмут"га қарши кечган сўнгги 3 ўйинда ғалаба қозонган.

- "Арсенал" АПЛда охирги 10та ўйиндан 9тасида ғалаба қозона олмаган.

Тахминий таркиблар

"Борнмут" (4-4-1-1): Рамздейл, Стейси, Фрэнсис, Мефам, Симпсон, Кук, Лерма, Биллинг, Фрейзер, Кинг, Уилсон

"Арсенал" (4-3-3): Лено, Найлз, Луиз, Сократис, Сака, Гендузи, Жака, Торрейра, Пепе, Ляказетт, Обамеянг

26.12 20:00 "Челси" - "Саутгемптон"

Лэмпард жамоаси ўтган турда “Тоттенхем”ни мағлуб этган ва жамоанинг кайфияти аъло даражада. “Стемфорд Бриж”да бўлиб ўтадиган навбатдаги учрашув охирги пайтлар чиройли ўйин кўрсатаётган Ральф Хазенхюттль шогирдларига қарши ўтади. Уларнинг таркибида тўпурар Денни Ингз бор ва у “Челси” ҳимоячиларига бош оғриқ бўлиши мумкин.

“Кўклар” кўпинча қуйи поғоналардаги жамоаларга қарши ўйнашга қийналади. “Саутгемптон” айнан шундай жамоадир. Яна ким билсин, олдинда бизни қизиқарли қарама-қаршилик кутиб тургани аниқ.

Ўйинга оид фактлар:

- "Челси" барча мусобақалардаги сўнгги 9 ўйиндан 8тасида ғалабага эришган.

- "Саутгемптон" иштирокидаги Премьер-лиганинг охирги 9 ўйинида камида 2,5 гол киритилган .

- "Челси" барча мусобақаларда "Саутгемптон"га қарши охирги 3 уй ўйинида гол ўтказиб юбормаган.

- "Челси" охирги 5 ўйинда "Саутгемптон"га мағлуб бўлмаган.

Тахминий таркиблар

"Челси" (4-2-3-1): Аррисабалага, Жеймс, Рюдигер, Томори, Эмерсон, Жоржиньо, Канте, Виллиан, Маунт, Хадсон-Одои, Абрахам

"Саутгемптон" (4-4-2): Маккарти, Суареш, Стивенс, Беднарек, Бертран, Армстронг, Уорд-Проуз, Хёйбьерг, Редмонд, Ингз, Лонг

26.12 22:30 "Манчестер Юнайтед" - "Ньюкасл"

МЮнинг “Уотфорд”дан мағлубиятга учрагани бутун Англия футбол жамоатчилигини ҳайрон қолдирди. “Ньюкасл” МЮнинг тушкун ҳолатидан фойдаланиб қолиш ниятида.

Бу ўйинда кутилаётган янгилик – Поль Погбанинг майдонга тушишидир. “Қизил иблислар” Погба орқали чиройли ўйин кўрсатишга ҳаракат қиладилар. Шунингдек, бугунги учрашувда Де Хеадан ҳам кўп нарса кутилмоқда яъни чиройли сейвлар ва “қуруқ ўйин”. “Ньюкасл” ҳимояга “ётиб олиши” экспертлар томонидан айтилмоқда. Кўрамиз, хулосаларимиз ўзини оқлармикин. Бу ўйинни сиз билан биргаликда кузатиб борамиз.

Ўйинга оид фактлар:

- "Манчестер Юнайтед" барча мусобақаларда "Ньюкасл"га қарши ўтган охирги 19 уй ўйинидан 18тасида мағлуб бўлмаган.

- Премьер-лига доирасида "Ньюкасл"нинг меҳмонда кечган сўнгги 3 ўйинида 2,5тадан кўп гол урилмаган.

- "Манчестер Юнайтед" АПЛда ўз майдонидаги охирги 7та ўйинда мағлубиятга учрамади.

Тахминий таркиблар

"Манчестер Юнайтед" (4-3-3): Де Хеа, Уан-Биссака, Линделёф, Магуайр, Янг, Погба, Мактоминей, Фред, Гринвуд, Марсял, Решфорд

"Ньюкасл" (3-5-2): Дубравка, Шер, Фернандес, Лежен, Манкильо, Хейден, Шелви, Альмирон, Виллемс, Кэрролл, Жоэлинтон

27.12 01:00 "Лестер" - "Ливерпуль"

Boxing Day’нинг марказий ўйини деб бемалол айта оламиз.

Рожерс Вардига Boxing Day’да дам беришини айтган, аммо бу бугун содир бўлмаса керак. Мураббий катта еҳтимол билан ўтган галги таркибни майдонга туширади.

“Ливерпуль”да жароҳатдагилар кўп, аммо “фантастик трио” бор – нима ғам бор? Брендан Рожерс собиқ жамоасига қарши ёҳуд у Клопп учун муаммо туғдира оладими? Бугун тунда даҳшатли ўйин орқали бунга гувоҳ бўламиз.

Ўйинга оид фактлар:

- "Ливерпуль" Премьер-лигада 34 ўйиндан буён ютқазмаяпти.

- "Ливерпуль" Премьер-лигада сўнгги 8 учрашувда камида 2та гол киритяпти.

- "Лестер" АПЛда охирги 11 уй учрашувларида мағлуб бўлмаган.

- "Ливерпуль" барча мусобақалардаги охирги 5 ўйинда "Лестер"га ютқазмаган.

Тахминий таркиблар

"Лестер" (4-5-1): Шмейхель, Перейра, Эванс, Сёюнджю, Чилуэлл, Перес, Тилеманс, Ндиди, Мэддисон, Барнс, Варди

"Ливерпуль" (4-3-3): Алисон, Арнолд, Гомес, Ван Дейк, Робертсон, Милнер, Хендерсон, Кейта, Мане, Фирмино, Салаҳ

28.12 00:45 "Вулверхэмптон" - "Манчестер Сити"

“Лестер” мағлуб этилгач, “Сити” яна ўзига келди. Энди Гвардиола шогирджларининг хато қилишга ҳаққи йўқ. Чемпионлик масаласи қийин, аммо каталониялик мураббий қойилмақом камбэкка ишонмоқда. Бу натижага тўсқинлик қилиш йўлида “Вулверхэмптон” бўш келмаса керак.

Майдон эгалари сафида жароҳатланган футболчилар кўп эмас. Мураббийда ҳеч қандай муаммо йўқ. “Сити”да эса Агуеро сафга қайтган, бироқ майдонга барибир Жезус туширилиши кутилмоқда.

Нуну Эшпириту Санту шогирдлари "шаҳарликлар"га қарши қандай ўйин кўрсатишини, айнан шу ўйинда яъни турнинг сўнгги учрашувида кўрамиз.

Ўйинга оид фактлар:

- "Манчестер Сити" Премьер-лигадаги охирги 19 ўйиндан 16тасида 2тадан кўп гол уриб келмоқда.

- "Бўрилар" АПЛда сўнгги 13 ўйиндан 12тасида ютқазмаган.

- "Бўрилар"нинг Премьер-лигадаги охирги 3 учрашувида камида 2,5та гол киритилган.

Тахминий таркиблар

"Вулверхэмптон" (3-4-3): Патрисиу, Дендонкер, Коуди, Саисс, Доэрти, Невиш, Моутинью, Хони, Траоре, Жота, Хименес

"Манчестер Сити" (4-3-3): Эдерсон, Уокер, Отаменди, Фернандиньо, Менди, Фоден, Де Брёйне, Родри, Б. Силва, Жезус, Стерлинг

Шунингдек, бу турда (бугун 20:00да):

"Астон Вилла" "Норвич"ни қабул қилади.

"Кристал Пэлас" "Вест Хем" билан ўйнайди.

"Эвертон" "Бернли" билан беллашади.

"Шеффилд" "Уотфорд"га қарши саф тортади.

АНГЛИЯ ПРЕМЬЕР-ЛИГАСИ ЖАДВАЛИ ВА ТЎПУРАРЛАР РЎЙХАТИ

Шерзод Нурматов тайёрлади.

АПЛ. 19-тур ўйинлари учун превью