Ҳозир эса 2016 йил бошланиб, 2017 йилда тугайдиган супер ўйинга бағишланган превьюни эътиборингизга ҳавола этамиз.

"Ливерпуль" – "Манчестер Сити"
31.12.2016, 22:30
"Энфилд" стадиони
Бош ҳакам: Крейг Поусон (Лондон)

Деярли бутун дунёда янги йил кириб келиши нишонланаётган бир паллада яшил майдонда тўп тепиш қандай эканлигини бугун фақатгина "Ливерпуль" ва "Манчестер Сити" футболчилари ҳис этишлари мумкин.

Юрген Клопп бошчилигидаги "қизиллар" айни пайтда Англиянинг энг "ёввойи" ва тажовузкор жамоасига айланишган. Мезбонлар футболчилари энг кўп югуришган, энг кўп гол уришган, энг кўп зарба беришган, аниқ зарбаларда ҳам етакчилар, ҳатто одатда Гвардиола жамоаларига ҳос бўлган кўп паслар бериш борасида ҳам "мерсисайдликлар" чемпионатда энг яхши кўрсатгичга эгалар. Клопп жамоаси ҳимоясида муаммолар етарлича, клуб керагидан ортиқ даражада голлар ўтказиб юбормоқда. Сўнгги пайтларда Деян Ловрен билан ҳимоя марказида асосий ижрочига айланиб қолган Жоэл Матип бугун ўйнай олмайди. Шунингдек, бош мураббий Коутиньонинг тушмаслигини ҳам тасдиқлади. Лекин, "Ливерпуль" бразилияликсиз ҳам дахшатли ҳужумлар уюштирмоқда. Агар табир жоиз бўлса, чемпионатдаги энг қўрқинчли ҳужумкор ўйинчилар айнан Клопп жамоасида йиғилган. Клуб шунақанги кўп ва хавфли ҳужумлар уюштирадики, бундай ўйинга қарши баъзида "автобус" ҳам ёрдам бермайди. Бугун олдинда Лаллана, Мане, Фирмино ва Оригиларни кўрсак керак. Бу эса меҳмонларга жуда қийин бўлишини англатиб турибди.

Гвардиола бошчилигидаги "Манчестер Сити" битта маромда ўйнай олмаяпти. Жамоа кўплаб ҳужумлар уюштирмоқда, лекин улардан фойдаланиш даражаси юқори эмас. "Сити" тўпни назорат қилишга катта эътибор қаратмоқда, лекин Англияга хос бўлган узун паслардан ҳам воз кечилгани йўқ. Ҳудди, рақибда бўлгани каби "шаҳарликлар"да ҳам ҳимоя билан боғлиқ муаммолар етарлича топилади. Ушбу мавсум бир қатор голлар айнан орқа чизиқдаги хатолар эвазига ўтказиб юборилди. Чемпионат олдидан катта умидлар билан яхшигина пулга сотиб олинган Жон Стоунз ҳам ишончни оқлай олмаяпти. Камига, жароҳатлар ҳам жамоани четлаб ўтмаяпти. Шунга қарамай, "Сити" мухлисларини хурсанд қиладиган нарса бугун жамоанинг асосий "снайпер"и Серхио Агуэро майдонга тушиши мумкин. Кун Агуэро исталган вазиятда ўзига голли имкониятни яратиб ола биладиган ҳужумчи ҳисобланади.

Бугун мухлислар катта эҳтимол билан ҳужумкор ва тезкор ўйин гувоҳи бўлишади. Бу асло ҳимоявий тактика танланадиган баҳс эмас. Майдонда Гвардиола ва Клопп жамоалари ўзаро беллашаётган бўлса, ҳужумкор ўйин кафолатланган бўлади.

Қизиқ:

- "Ливерпуль" "Сити"га қарши охирги учта Премьер-лига ўйинида ғалаба қозонган. "Қизиллар" сўнгги бор 1981 йилда "шаҳарликлар"ни кетма-кет тўрт учрашувда таслим этишган;
- "Манчестер Сити"нинг АПЛ доирасида "Энфилд"даги сўнгги ва ҳозирча ягона ғалабаси 2003 йилнинг майида рўй берган. Ўшанда Николя Анельканинг собиқ жамоасига қарши баҳсдаги дубли "Сити"га 2:1 ҳисобида ғалаба келтирган;
- Серхио Агуэро Премьер-лигада "Ливерпуль"га қарши ўйинларда тўртта гол урган. Лекин, уларнинг ҳеч бири "Энфилд"да киритилмаган;
- Адам Лаллана бу мавсум Премьер-лигада бошқа ярим ҳимоячиларга қараганда кўпроқ голларда бевосита иштирок этган (13 - 7та гол ва 6та голли пас).

Бу йил бошланиб, кейинги йил тугайдиган супер беллашувга сўнгги сўз ўрнида "мерсисайдликлар" устози Клоппнинг гапини келтириб ўтмоқчимиз:
- Агар мен захира ўриндиғида ўтирмаганимда "Ливерпуль" - "Манчестер Сити" учрашувига 100 фоиз аниқки, чипта сотиб олган бўлардим.

Толибжон Қосимов

Eplmanager.com сайтида янги совринли лига ишга тушди. Жамоа тузишга ўтиш

АПЛ. 2016 йил бошланиб 2017 йилда тугайдиган ўйин превьюси