Тўртинчи тур учрашувларини Манчестер дербиси очиб берди. Унда Пеп Гвардиола шогирдларининг қўли баланд келди. Мезбонлар сафида Златан Ибрагимович ўз жамоасининг ягона голига муаллифлик қилган бўлса, Де Брюйне ва Ихеаначонинг голлари "шаҳарликлар"га ғалаба олиб келди.

"Тоттенхэм" "Сток Сити"ни 4:0 ҳисобида таслим этди. Сон Хён Мин, Алли ва Кейн муаллифлигидаги голларга меҳмонлар жавоб бера олишмади. "Арсенал" эса ўз мухлисларини асабийлаштиришда давом этмоқда. "Тўпчилар" ўз майдонида "Саутгемптон"ни қабул қилиб, сўнгги дақиқада пенальтидан урилган гол туфайли 3 очкони қўлга киритишди. "Ливерпуль" АПЛнинг амалдаги чемпиони "Лестер"ни йирик ҳисобда мағлуб этди. "Тулкилар" дарвозасига урилган тўртта голга, Клаудио Раньери жамоаси Вардининг ягона голи билан жавоб берди. Наҳотки ушбу эртак якунланган бўлса?

"Челси" бу турда очко йўқотишга мажбур бўлди. "Суонси" кўкларни қийнаб қўйган паллада, "аристократлар"га Диего Коста ёрдамга келди ва ўз жамоаси учун бир очко ишлади. "Сандерленд" ва "Эвертон" ўртасидаги баҳс Ромелу Лукакунинг "қайта туғилиши" бўлди. Бельгиялик ўз ҳисобига хет-трик ёздириб қўйди ("EPLMANAGER"да супер-капитан - 51 очко). Шундай қилиб, АПЛнинг фентези-лигасидаги Осиё Очиқ Чемпионати ғолибини аниқлашда Лукаку муҳим ролни эгаллади.

Осиё Очиқ Чемпионати ғолиби "FC ABS" жамоаси бўлди ва у сўнгги турда 88 очко тўплашга муваффақ бўлди. Унинг таъқибчиси 9 очко ортда қолди.

Бундан ташқари, ушбу совринли лигада иккинчи ўрин ҳам Ўзбекистон вакилига насиб этди. Ушбу совринли лиганинг кучли ўнлигида 5 нафар ўзбекистонлик борлиги бизни қувонтиради. Ғолиб эса Ўзбекистонни "EPLMANAGER" сайтидаги ҳозирча энг муваффақиятли мамлакатга айлантирди. Кейинги совринли мусобақаларда ҳам ҳамюртларимизга омад тилаб қоламиз.

Ҳафтанинг энг яхши футболчилари:

1 - Romelu Lukaku (Everton) 17 очко

2 - Son Heung-Min (Tottenham) 16 очко

3 - Michail Antonio (West Ham United) 12 очко

4 - Etienne Capoue (Watford) 10 очков

"EPLMANAGER"нинг 4-турида энг кўп очко жамғарган фойдаланувчи

Осиё Очиқ Чемпионати ғолиби билан интервьюни тез орада эълон қиламиз.

АПЛ. 4-тур шарҳи ва "EPLMANAGER"да ғолиб аниқланди