Диего Синагра отасининг вафоти тасодиф бўлмагани ва бу фожиада уни даволаган шифокорлар айбдор эканлигини таъкидлади.

"Мени энг кўп азоблайдигани – отамни ўлдиришгани. Бу шубҳасиз. Уни қутқариш учун ҳеч нарса қилишмади. Ишончим комилки, биз шифокорларнинг эътиборсизлигини исботлаймиз", – деди кичик Марадона.

Эслатиб ўтамиз, Диэго Марадона 2020 йил 25 ноябрда 60 ёшида вафот этганди. Ўлимнинг расмий сабаби юрак хуружи деб кўрсатилган бўлса-да, ўшандан бери машҳур футболчига кўрсатилган тиббий хизмат сифати борасидаги баҳслар тинмаяпти.

Юлдузнинг вафотидан сўнг унинг шахсий шифокори ҳамда Марадона вафот этган куни унинг уйида навбатчилик қилган ҳамшира полицияда ҳам гумон келтириб чиқарган. Бу эса терговнинг бошланишига сабаб бўлган. Иш бўйича 7 киши айбланган.

Аввалроқ Италияда аргентиналик юлдуз амалда ўлдирилгани ҳақида маълумотлар берилганди.

Марадона "Барселона", "Наполи" ва "Ньюэллс Олд Бойз" жамоаларида ўйнагани билан ном қозонган. У Аргентина терма жамоаси таркибида 1986 йил жаҳон чемпиони унвонини қўлга киритган ва футбол тарихидаги энг буюк ўйинчилардан бири ҳисобланади.

Аргентинада шов-шувли воқеа: Марадонанинг ўғли отасини шифокорлар ўлдирганини айтмоқда