Чемпионат баҳслари давомида ҳам ўзининг голлари ва аниқ тўп узатишлари орқали жамоамизнинг ғалабаларига катта ҳисса қўшиб келаётган футболчи учрашув ҳақидаги фикрларини билдириб ўтди.

-Кечаги ўйинда илк маротаба стадионимиз мухлислар билан тўлиб тошди. Бу мавсумда биринчи маротаба бундай ҳолат рўй бериши эди. Шунинг ўзиёқ ушбу учрашувнинг аҳамияти юқори эканлигидан далолат беради. Ўз навбатида мухлисларимиз бизни бутун учрашув давомида фантастик тарзда қўллаб-қувватлаб туришди. Бу ҳам ғалаба қозонишимизда муҳим роль ўйнади, десам муболаға бўлмайди. Стадион тўла ишқибозлар кўз ўнгида тўп суриш албатта ёқимли... Учрашув жуда кескин ва муросасиз кечди. Ҳар иккала жамоа ҳам финалга лойиқ эди. Лекин биз яратилган имкониятлардан самаралироқ фойдаландик ва финал йўлланмасига эга чиқдик.

-Ўйин давомида икки маротаба пеналти тепиш учун “нуқта”га яқинлашдингиз. Ўша пайтда ҳаяжон бўлмадими?
-Бўлди, албатта. Лекин икки сафар ҳам дарвозабонни чалғита олдим. Омад биз томонда бўлди. Умуман олганда бу ўйинда хато қилишга ҳаққимиз йўқ эди. Умид қиламанки, кейинги учрашувларда ҳам мухлисларимиз стадионни тўлдириб, бизга руҳан далда бўлишади. Биз эса уларга хурсандчилик улашиш учун бор имкониятимизни ишга соламиз.

А.НУРИЙ суҳбатлашди.

Артур Геворкян: “Хато қилишга ҳаққимиз йўқ эди”