- Ўйин ҳақида фикрингиз?

- Тезкор гол ўтказиб юбордик. Бу ҳам ўйинимизга таъсир қилди. Андижонда мухлислар катта куч ҳисобланади. Буни ўйиндан олдин футболчиларга айтиб, босимга дош беришимиз кераклигини айтгандик. Ўтказиб юборилган голдан сўнг ўзимизга келиш қийин бўлди. Бу ўйинга берилган кўрсатма ғалаба қозониш эди, чунки ҳозирги ҳолатда олдимизда бундан бошқа вариант йўқ. Бугун учта гол уриб, тўртта ўтказдик. Ҳужумда режамиз иш берди-ю, аммо ҳимояда хатолар кузатилди. Йўқса мағлубиятга учрамасдик. Мағлубиятга қарамасдан бугунги ўйин учун футболчиларимизга раҳмат айтмоқчиман. Биз қўлдан келганча ҳаракат қилдик. Мухлисларга ёқадиган футбол кўрдик деб ўйлайман.

- Биринчи бўлимдаёқ икки нафар футболчини алмаштирдингиз. Бу ҳимоячиларнинг яхши ўйин кўрсата олмагани билан боғлиқми?

- Алмаштирилган футболчилар ўйин тезлигига киришиб кета олмади. Биринчи гол ўнг қанотимиздан содир бўлди. Ҳужумга чиқишда ҳам ишонч етишмади. Ишончни қайтариш учун футболчиларни алмаштирдик.

- Аброр Тошқўзиев билан Жасур Ҳакимов бугун захирадан майдонга туширилди.

-Ўйинга белгиланган тактика ҳамда футболчиларнинг жисмоний ҳолатидан келиб чиқиб уларни захирада қолдирдик. Аброрни қанотга туширдик, Ҳакимов эса ҳужумга қўшилди. Шундан сўнг икки нафар ҳужумчи билан ўйнай бошладик.

- "Шўртан" Суперлигада жон сақлаб қола оладими?

- Орадаги очколар фарқи катта. Бунинг устига Суперлигада жамоалар даражасидан келиб чиқиб айтадиган бўлсам, бу жуда қийин бўлади. Аммо олдимизда бошқа йўл йўқ. Ҳар бир баҳсга фақат ғалаба учун чиқишдан бошқа чорамиз йўқ. Бизга кучли ҳимоячилар керак, чунки катта куч бўлиб олдинга ўтяпмиз ва бу пайт ҳимояда муаммолар юзага келяпти. Ҳимоямиз очиқ қолаётгани боис голлар ўтказяпмиз.

- Пенальти ҳақида фикрингиз?

- Ҳакамлар ВАРга мурожаат қилиб якуний қарорни қабул қилишди. Шунинг учун бу борада бирон гап айта олмайман.

Асрор Алиқулов: "Қўлдан келганча ҳаракат қилдик"