Жанговар руҳда кечган учрашувда томонлар дуранг натижа қайд этишди(2:2). Биз эса баҳсдан сўнг мезбонларнинг тажрибали футболчиси Асрор Ғофуровнинг фикрлари билан қизиқдик.

"Об-ҳавонинг иссиқлиги икки жамоага ҳам қийинчилик туғдирди. Бошқа томондан уч ойга яқин ўйин амалиётсиз қолдик. Эндиликда киришиб олишимизга бир мунча вақт кетади. Ҳа, "Локомотив" билан ўртоқлик учрашувида ҳам, бугун ҳам тайм ўрталарига келиб ўйинимиз очилмоқда. Буни сездингиз. Дастлабки 15 дақиқа ҳар бир жамоа учун мослашиб олишга сарфланади.

Мураббийимиз машғулотларда биздан нима истаётганини тушунтириб бермоқда. Нима кутаётганини онгимизга сингдирмоқда. Вақт ўтиши билан улар истаган ўйинни кўрсата оламиз. Баҳром Ҳайдаров биздан майдонда интизомга амал қилишимизни ва ҳужумкор футбол кўрсатишимизни талаб қилмоқда. Иккинчи бўлимда ирода кўрсата олдик ва ҳисобдаги фарқни йўққа чиқардик. "Машъал" таркибида иқтидорли ёш футболчилар тўп тепмоқда. Уларнинг келажаги порлоқ. Муҳими катта танаффусдан сўнг чемпионатни бошлаб олдик. Эндидикда машғулотларда ўз устимизда кўпроқ ишлаймиз. Олдинда осон бўлмаган ўйинлар кутмоқда. Биз ҳар бир баҳсда ғалаба қозонишни хоҳлаймиз",- дейди Асрор Ғофуров.

Асрор Ғофуров: "Баҳром Ҳайдаров футболчилардан ҳар бир ўйинда интизом ва ҳужумкорликни талаб қилмоқда"