1 октябрь куни старт олган чемпионатда 8та клуб дастлаб икки давра давомида кураш олиб боришди. Энг юқори тўрт ўринни эгаллаган клублар ярим финалда уй сафар тизимида ўйин ўтказишди.

Ярим финалларда "Керала Бластерс" "Деҳли Динамос" ни, "Атлетико Калькутта" эса "Мумбай Сити"ни мағлуб этиб финалга чиқишди.

Бугун бўлиб ўтган финал учрашувида англиялик Стивен Коппел бошчилигидаги "Керала Бластерс" клуби испаниялик Хосе Молина бошчилигидаги "Атлетико Калькутта"га қарши баҳс олиб борди. Дастлаб 37-дақиқада Муҳаммад Рафи "Керала"ни олдинга олиб чиқди. Танаффусга чиқиш арафасида Энрике Серено мувозанатни тиклади. Бу ҳисоб ўйин охиригача сақланиб қолди. Қўшимча таймларда ҳам гол урилмади. Шу боис ғолиб пенальтилар сериясида аниқланди.

Футбол лотореясида "Атлетико" футболчилари омадлироқ чиқишди - 4:3. Шу тариқа бу клуб ўз тарихида иккинчи марта Ҳиндистон Суперлигасида чемпионликка эришди. 2014 йилда ҳам "Атлетико" шохсупанинг энг юқорисига кўтарилган эди. Ўтган йил "Ченнайин" чемпион бўлганди.

"Атлетико" сафида бу мавсумда португалиялик Элдер Поштига, Энрике Серрено, испаниялик Хави Лара, Борха Фернандез, Тири, Дани Малло каби легионерлар фаолият олиб боришди.

"Керала Бластерс" - "Атлетико Калькутта" 1:1 (3:4 пенальтилар серияси)
Голлар: М.Рафи 37 - Серено 44

"Керала Бластерс" - Стак, Хьюз, Энгбарт, Жинган, Аҳмед, Ҳуссайин, Маҳамат, Винет, Рафи, Белфорт, Назон
Захирадан тушганлар: Ндойе, Рафике, Герман.

"Атлетико Калькутта" - Мажумдер, Серено, Перейра, Тири, Котал, Борха Фернандез, Доутие, Ража, Ралте, Элдер Поштига, Хуме
Захирадан тушганлар: Дас, Хави Лара, Нато.

Сайтимизнинг Facebook даги саҳифаси - facebook.com/championat.asia

"Атлетико Калькутта" - Ҳиндистон Суперлигаси чемпиони!