Сўнгги 3 мавсумни "Бунёдкор"да ўтказган футболчи янги мавсумда Олмалиқда тўп тепади. Орада турли манбалар унга ЦСКА томонидан қизиқиш борлигини ҳам эълон қилди. Бу қанчалик ҳақиқат эди? Нима учун ОКМКни танлади? Шу ва бошқа саволларга Авазбек Ўлмасалиевдан фикр олдик.

- "Бунёдкор"га келганингизда ёш футболчи эдингиз. Асосий таркиб футболчисидан жамоа сардори даражасигача кўтарилдингиз...

- "Бунёдкор" жамоасига катта раҳмат айтаман. Клуб билан турли даврларни бошдан кечирдик. Бир нечта мураббийлар билан ишладик. Ғалабали онлар ҳам, мағлубиятли пайтлар ҳам бўлди. Бу жамоа бир умр қалбимда қоламан. Насиб қилса, яна шу жамоада ўйнайман.

- ЦСКА жамоаси қизиқиш билдиргани ростми? Бу ҳақидаги хабарни биринчи бўлиб кимдан эшитдингиз?

- Ҳа, ЦСКА жамоасидан қизиқиш бўлди. Лекин аниқ таклиф билан чиқишгани йўқ. Агентлар бу ҳақида маълум қилишди. Яна турлича вариантлар беришди. Ўхшамади шекилли жим бўлиб қолишди.

- ОКМКга ўтиш қандай содир бўлди?

- Миржалол Қосимов таклиф билан чиқдилар. Агар легионерга айланмасам, ОКМКга ўтаман деган эдим. Уйдагилар билан маслахатлашган ҳолда шу қарорга келдим.

- Универсал футболчи ҳисобланасиз. ОКМКда сиздан қайси позицияда фойдаланишмоқда?

- Қайси позицияда фойдам тегса, мураббий қаерда ўйнатса, ўша жойда ҳаракат қиламан.

- ОКМКда қайси рақамда тўп тепасиз?

- Ҳар бир футболчининг яхши кўрган рақами бўлади. Янги мавсумда 6-рақамда ўйнайман.

Абдулазиз Искандаров суҳбатлашди

Авазбек Ўлмасалиев: "Бунёдкор"га раҳмат. ЦСКА қизиқиш билдирди. Лекин..."