Уларнинг бирини ишдан олишди, иккинчиси ОАВ ва мухлисларнинг талабига кўра ўзи кетди. Инилеев ҳам пайтида ўз истаги билан терма жамоани тарк этди. Лекин мураббийларни алмаштираверганимиз билан Жанубий Корея, Эрон ёки Японияни ютадиган жамоа бўлиб қолмаяпмиз. Ҳозир бизга истаган чет эллик мутахассисни олиб келинг, майли ўша чақирилмаётган футболчиларни ҳам терма жамоага чақирайлик. Биз йиллар давомида мағлубиятга учраб келаётган Жанубий Кореяни юта оламизми?

Келинг, каллани бир жойга қўйиб ақл билан фикр юритамиз. Кечаги ўйин 100%лигича Бабаянники. Чунки майдонда ОАВ эътироф этган ўйинчилар ва мутахассислар томонидан таклиф қилинганлар эмас, у танлаган футболчилар ҳаракат қилдилар. Агар кўпчилик истаётган футболчилар билан майдонга тушганида, унга нисбатан қилинаётган танқидлар бугунгидек кўп бўлмасди. "Боримиз шу-да", - деб қўяверардик.

Қосимов 2008 йил учун тайёр эмасди. Аммо, уни терма жамоага иккинчи келиши бошқача бўлди. Янги Зелландия, сафарда БАА устидан қозонилган йирик ҳисобдаги ғалаба, Осиё чемпионатида Саудия Арабистонини ҳакамга қўшиб мағлуб этганимиз ва бизни ҳеч тинч қўймаётган Жанубий Кореяга ўйин борасида ютқазмаганимиз. У энди "пишган" жойида ишдан кетди.

Абрамов кейинги фаолиятида қандай ишларди ҳеч ким билмайди, чунки у ишдан олинган. Унинг охири бўлмади. Охири ғалаба билан тугармиди ёки мағлубият, буни энди била олмаймиз. Факт шундан иборат-ки, Вадим Карленович даврида терма жамоамизнинг ўйинлари умуман бошқача эди.

Бундан тўрт йил аввалги мақолам кечагидек ёдимда, "Биз 2014га ҳам, 2018га ҳам чиқа олмаймиз, токи, ички тизимни тўғирламагунимизча", - деб қайд этган эдим. Мақола, мақолалигача қолиб кетди. Одатга кўра айб мураббийдан қидирилди. Ўшанда асл айбдорлар топилганида эди, ўшанда тизимни янгилаб олий лигага жон ато этилганида эди. Биз 2018га эмас, 2022 йилга ҳаракат қилсак бўларди. Одил Аҳмедовга кечаги ўйинда рости ачиниб кетди. Теннис тўпига ўхшаб, у ердан бу ерга учади. 2022 йил учун бизда Одилнинг ўрнини босадиган ўйинчини кўраяпсизларми? Олий лига захирасида борми шундай футболчи? 22 ёшида лиганинг энг яхшилари қаторидан жой олганди. Ҳозир шу ёшда кимни эътироф этасиз? Ҳеч кимни, чунки қолмаяпти бизда яхши ўйинчилар. Бу ўйинчиларни айби эмас, эплагани-ку, шу тизимни енгиб чиқиб ўйнашяпти. Қанчадан - қанча истеъдодлар ўтиш босқичидан ўта олмаяптилар.

Кимгадир Абрамов ёқади, кимгадир Қосимов. Яна кимлардир Бабаянни маъқул кўришди. Лекин бир нарсага эътибор беринг, бу уч мутахассиснинг бари Осиёнинг етакчи тўтр жамоаси олдида ожиз бўлиб қолаверяптилар. 2011 йилги Осиё Кубогини оламиз. Ярим финалга келиб жиддий рақибга дуч келдик, мағлубият. Учинчи ўрин учун ўйинда Жанубий Кореяни юта олмадик. 2013 йил ЖЧ йўлидаги энг муҳим ўйинда яна корейслардан устун кела олмадик. Бу босқичда ҳам ҳудди шу нарсани кузатяпмиз, Эрон ва Жанубий Корея ўзи учун керак ўйинда биздан очкони ола билди. Ички ресурсни кучайтирмай туриб, ички мураббийлар билан натижага эришиб бўлмайди. Биз Осиёнинг тўрт жамоаси қаторида эмасмиз. ЖЧга чиқиш учун ўша тўртликда бўлиш керак. 2022 йилда ҳам бу тўртликда бўла олмаслигимизни барчангиз яхши биласиз.

Тўртликда бўлиш учун, ҳар бир жамоада академия бўлиши керак;

Тўртликда бўлиш учун, росмана "ПРО" лицензияга ўқиш керак, биздаги каби қўл учида, биров ёзиб берган конспект асосида эмас. Яна бир маълумотни ўзингиз учун, айтиб ўтаман. Биздаги "ПРО" лицензияси Европа, Осиёдан Австралияга ўтмайди. Япония ва Жанубий Кореяда эса биз томонимиздан бериладиган "ПРО" лицензияларига жиддий эътибор қилинмайди;

Тўртликда бўлиш учун, ОЛИЙ ЛИГА росмана ишлаши керак;

Тўртликда бўлиш учун, БИРИНЧИ ЛИГАда олий лигага чиқиш учун курашадиган ҳеч бўлмаса 5та жамоа бўлиши керак;

Тўртликда бўлиш учун, ёшлар лигасида ёшлар ўйнаши керак, натижа учун қарияларни тушириш эмас;

Тўртликда бўлиш учун, 15-17 ва 17-19 ёшли футболчилар учун махсус лига бўлиши керак;

Тўртликда бўлиш учун, Сизда Европа ва Осиёнинг гранд федерациялари билан дипломатик алоқалар йўлга қўйилган бўлиши керак. Шунда Сиз улар ёрдамида мутахассисларингизни тажрибасини ошириб бориш имкониятига эгасиз.

Яна тўртликда бўлиш учун жуда кўп ишлар қилиниши керак. Энг аввало бизда аниқ дастурни тузиб чиқмоқ керак.

Назарий жиҳатдан ЖЧ учун имкониятимиз ҳамон сақланиб турибди. Энг ёмони шунда. Сақланиб турибди деб кейинги ўйингача ҳеч нима қилмай ўтираверишимизда. Неча йиллардан бери ЖЧга чиқа олмаймиз, ўша йиллардан бери ечим ҳақида ўйламаяпмиз. Нега истеъдодларга бой ўлкадан бошқа Қосимов чиқмаяпти, нега Одил яккалик қилаяпти? Нега терма жамоада қариялар кўпайиб кетди? Қани шунча йиллардан бери футбол мактабларида тўп тепиб келаётган ёшлар? Улар ҳозир нима учун МТЖда эмас, футболдан ташқарида деган савол берилмяпти? Месси мисолида касал боладан, жаҳон футболининг етакчи кўринишини ясай олган "Барселона" қилган ишни, нима учун биз Осиёнинг ҳеч бўлмаса тўртинчиси бўлиш учун соғ болалардан МТЖ савиясидаги ўйинчиларни етиштира олмаяпмиз?

МТЖнинг натижалари, биз томонимиздан йўл қўйилаётган ва қилишни истамаётган ишларнинг меваси!

Яна бир қўпол хато шундан иборат бўлди-ки, ҳали яхши посбонларни таёрламай туриб олий лигада ҳорижлик дарвозабонлар хизматидан воз кечганимиз. Биз аввал дарвозабонлар етиштириб берадиган мураббийларни тарбиялайлик, кейин дарвозабонларни. Ҳали биринчисини бажармай туриб, қаердан биз яхши дарвозабонларга эга бўламиз? Дарвозабонларни етиштириш борасида дастур борми? Қайси методика асосида уларга тарбия бераяпмиз? Йил бошида ўтказилган 2 ҳафталик йиғиндан бошқа нима қилинди? Бир қизиқинг, нечта жамоада ёш дарвозабонлар билан ишлайдиган мураббийлар бор? Ўша ҳорижлик посбонлардан бизникилар кўп нарса ўрганишаётганди. Энди кимдан ўрганишсин?

Шу вазиятда бизга ҳорижлик мураббий ёрдам бера оладими? Бера олади, ҳеч бўлмаса Сурия каби етакчи жамоалар билан дуранг ўйнашни ўрганишимиз мумкин. Лекин ютиш учун, аввал ички тизимни тўғирлашимиз керак.

Бунинг учун "ЖЧ-2026" дастурини ишлаб чиқишимиз ва унинг устида бутун Ўзбекистон бўйлаб иш олиб борсак, ана ўшанда биз Осиёнинг тўртинчи жамоаси бўламиз! 10 йил узоқмасми дейсизми? Германия 2004 йилдан кейин 10 йиллик дастурини ишлаб чиқди, натижани барчангиз кўриб турибсиз.

Нодирхўжа Юлдашев

Айб на Абрамов ва на Қосимовда эди!