Ушбу ўйиндан кейин "Шабаб Ал Аҳли" ярим ҳимоячиси ўзбекистонлик Азизжон Ғаниевнинг фикрлари билан қизиқдик.

- Азизжон Суперкубокдаги ғалаба муборак бўлсин! Ўйин қандай ўтди?
- Табрик учун раҳмат. Мени қувватлаб турган барча мухлисларга ҳам миннатдорчилик билдирмоқчиман, барчага раҳмат. "Шаржа"га қарши қизиқарли ўйин бўлди. Иккала жамоа ҳам ғолиб бўлиш учун охиригача курашди. Сўнгги дақиқаларда гол уриб ғалаба қозондик, жамоамга фойдам текканидан хурсандман.

- Рақиб сафида ўзбекистонлик Отабек Шукуров ўйнади...
- Отабек Шукуров билан учрашувдан олдин гаплашдик, бир-биримизга омад тиладик. Ўйиндан кейин Отабек ака ёнимга келиб ғалаба билан табрикладилар, мен учун хурсанд эканликларини айтдилар. Уларга кейинги ўйинларда омад ёр бўлишини тиладим.

- Кечаги ғалабани кимга бағишлайсиз?
- Ушбу ғалабани уйда дуо қилиб турган ота-онамга бағишлайман. Шу даражага етишимда улар жуда ҳам катта ҳисса қўшишган.

- Сўнгги савол Достонбек Ҳамдамов БАА чемпионатига кўчиб ўтди. Дастлабки ўйин айнан сиз ўйнаётган "Шабаб Ал Аҳли"га қарши ўтди...
- "Ал Наср" билан шартнома тузган Достон ака учун жуда ҳам хурсанд бўлдим. Биринчи ўйин доим оғир бўлади, айниқса бегона чемпионатда. Худо хоҳласа ўзларининг энг яхши ўйинлари билан барчани хурсанд қиладилар.

Нарзулла суҳбатлашди

Азизжон Ғаниев: "Суперкубокдаги ғалабани ота-онамга бағишлайман"