Кетиш чоғида сайтимиз мухбирлари бош мураббий Баҳодир Аҳмедовнинг фикрлари билан қизиқди.

"Тайёргарлик жуда яхши ўтди. Машғулотлардан кўнглимиз тўлди. Испаниялик мураббий билан ишладик. Йигитлардан кўнглим тўқ. Катта жароҳатлар йўқ. Футзалчилар бўлажак баҳсларга тайёр.
Руҳият доимгидек жанговар. Бу борада ҳам муносиб тайёрландик. Мусобақанинг илк ўйини доим қийин ўтади. Ғалаба учун ўйнаймиз. Мухлисларга бизни доим қўллаб-қувватлашаётгани учун миннатдорчилик билдираман. Уларни хурсанд қилишга ҳаракат қиламиз",- дейди Баҳодир Аҳмедов.

Шунингдек, иқтидорли футзалчи Ҳусниддин Нишонов ҳам фикрлари билан ўртоқлашди.

"Ички муҳит жуда зўр. Тайёргарлик яхши кечди. Испаниялик мутахассис билан ишлаб жисмоний ҳолатимизни янада оптималлаштирдик. Бу йилги Осиё чемпионатида Эрондан оладиган реваншимиз бор. Ватанимизга ёруғ юз билан қайтишни мақсад қилганмиз. Кетишдан олдин бироз ҳаяжон борлигини ҳисобга олмаса, ҳаммаси жойида. Насиб қилса, юртимизга медал билан қайтиш учун бор кучимизни ишга соламиз",- дейди Ҳусниддин Нишонов.

Баҳодир Аҳмедов: "Мусобақага жароҳатларсиз йўл олдик. Футзалчилар ўйинларга тайёр"