- Осон бўлмади. Қийин ўйинлар бўлди. Ўз навбатида ПФЛ ва ЎФА раҳбариятига миннатдорлик билдираман. Улар мавсумни яхши ўтказиб беришди. Шунингдек, чемпионатдаги жамоаларга ҳам кучли рақобат учун раҳмат айтмоқчиман. Ушбу мавсумда қўлга киритилган совринлар учун Жиззах вилояти Ҳокими Эргаш Салиевга ҳам ташаккур изхор қилмоқчиман. Ушбу инсон сабабли яхши жамоа туздик. Биргаликда икки совринни қўлга киритдик.

- Мавсум жамоа учун оғир бошланди. Мавсум якунига қадар икки соврин қўлга киритишингизни кутганмидингиз?

- Менимча бирор жамоа олдиндан ғалаба қозонишини билмайди. Чунки ҳозир барча жамоалар ғалаба учун ўйнамоқда. Мавсум бошида бир неча жамоалар чемпионликни вазифа қилди. Йигитлар аста-секин ўз ўйинини топиб олганидан кейин чиройли ғалабалар қўлга киритила бошланди.

- Кубокдаги қайси ўйинлар қийин бўлди?

- Менимча деярли барча баҳс қийин бўлди. Нафақат биз, балки, бошқа учрашувларда ҳам рақобат кучли ўтди. Бугун "Пахтакор" ҳам яхши ўйин кўрсатди. Бугун ўз имкониятларимиздан фойдаланганимиз учун ғалабага эришдик.

- Ярим финалда ўзингизнинг терма жамоадошингиз Нодир Элибоевнинг жамоасига қарши баҳс олиб бордингиз. Бу ўйиндан қандай таассуротлар қолди?

- Жамоа яхши экан, улар қаршилик кўрсата олишди. Тажриба эвазига уларни мағлуб этдик.

- Одатда совринлар қўлга киритилганида раҳбарият томонидан рағбатлантирилади. Сир бўлмаса жамоага нималар совға қилинади?

- Ҳа, ваъда қилинган. Совғалар топширилади, ўшанда барча билиб олади.

Баҳодир Аҳмедов: "Ушбу мавсумда кўплаб жамоалар чемпионликни мақсад қилганди"