Буни барчасини қалам тебратиб ифода қилиб бериш қийин. Шундай бўлсада, озроқ ахборот билан суратларни тақдим этишга ҳаракат қиламан. Кеча 3-ўрин учун баҳс якунига етгач автобусда Санкет-Петербург - Москва йўналиши билан манзилимга етиб келдим. Москва вақти билан соат 13:00да устоз, Анвар ака Илёсов билан стадионга кирдик. Медиа чипталарни олганимиздан сўнг, ишга киришдик.

Айни пайтда медиа марказда 1000 нафардан зиёд ОАВ вакиллари иш олиб бораяптилар. ЖЧда жамоалари йўқ жуда кўплаб давлатларнинг телевидениясидан камера кўтариб юрган мухбирларни кўрасиз. Улар фақат ўйинлар билан чекланиб қолмаяптилар. Атрофдаги қизиқарли воқеаларни ҳам ёритиб бораяптилар.

Жанубий америкаликларга қойил қолмай иложи йўқ. Аргентина, Бразилия ва Уругвай терма жамоалари аллақачон мундиални тарк этган бўлсаларда, бошқа давлат вакилларидан ташқари буларнинг мухлислари ҳали ҳамон Москва кўчаларида байрам қилиб юришибди. Тўғри, уларнинг аксарияти чипталарни сотиб уйга равона бўлганлар. Аммо айнан ЖЧ учун меҳнат таътилини олганлар, ўзлари учун байрам қилишда давом этадилар.

Стадионда "Coca Cola", "Smartwater" ва "Bud" 0 градусдаги пиводан бошқа ичимлик йўқ. Бу ичимликларни бозори чаққон. Нархлар ҳам арзон эмас, 10 долларгача. Чипта топа олмай хуноб бўлаётганлар ҳам йўқ эмас. Ташқарида 2000 АШҚ долларигача чипталарни кўришингиз мумкин. Пули борга не ғам?

"Лужнии" стадиони финал олдидан турли миллатларга тўлган. Ўзимизникилардан тортиб, ер шарининг бир чеккасидан ҳам мухлислар ташриф буюрганлар. Бу ҳақда қисқача видео роликни кўчириб олиш орқали томоша қилинг - ВИДЕО

Барчаси жонли, "Лужники"дан "CA"нинг репортажи!