"Бавария" ҳамон клуб афсонасига ўринбосар изламоқда

Рибери фаолиятининг илк даври анча қийин бўлган. Франциялик Аль Пачино киноларида бўлгани каби безорилардан эди. Вингер қонунларни бузмаган бўлсада, француз клубларидан кейин "Галатасарой"га бориб қолган. Истанбулдаги қисқа даврдан кейин унга эътибор қаратишади. "Марсель" кейинчалик ЖЧ-2006да Франция ярим ҳимояси қанотида ёрқин ўйин кўрсатадиган футболчи билан шартнома имзолайди. Кейин эса 30 миллион евро эвазига "Бавария"га трансфер амалга оширилади. Мюнхенда Рибери 12 йил истиқомат қилади. Эркин агент сифатида "Фиорентина"га кетди ва "Салернитана"да фаолиятини якунлади.

"Бавария" скаут ва менежерларида чап қанотда ўйнайдиган ўнг оёқли футболчига ўринбосар топиш учун олти йил бор эди. Вазифа ҳозирча бажарилмади. Шунга қарамай, чапда Рибери ва ўнгда Роббенсиз ҳам "Бавария" Флик қўл остида ЕЧЛ бош совринини қўлга киритди. Бутун дунё коронавирус муаммосини ортда қолишини кутиб яшаётганида клублар ўртасидаги энг муҳим мусобақа плей-оффида икки ўйин ўрнига биттадан учршаув ўтказилган ҳамда Команнинг собиқ жамоасига ПСЖ дарвозасига гол билан якунланганди. Финалда "Бавария" Мбаппе ва Неймардан гол ўтказиб юбормасликни уддалади. Аммо Коман, Дуглас Коста ва Гнабри узоқ йилларга Риберининг ўрнини эгаллай олишмади.

Шу билан бирга "Бавария" мураббийлари Дэвисни чап қанот вингери ролига ўтказишмади. Мюнхендагилар Альфонсо латераль сифатида фойдалироқ бўлади деб ҳисоблашди. Натижада, ҳар икки қанотда муаммо юзага келди. Арьен Роббен – "Бавария"нинг ўша Чемпионлар Лигасидаги ғалабасидан бир йил аввал клубни тарк этди. Фликнинг муваффақияти Германия гегемони менежерларини чалғитиб қўйди. Уларга ўшанда ўнг қанотга Гнабри ва чапда Коман етарлидек туюлганди. Захирада эса тажрибали Перишич, лекин хорватияликни бир йиллик ижарадан кейин Мюнхенда олиб қолишмади. Шунингдек, "Бавария"да испаниялик вингер Сарагоса ҳам узоқ қолмади.

Диас – Риберининг ўрнига "Ливерпул"нинг яна бир вингери

Франк каби Диас ҳам ўнг оёқда ўйнайдиган чап қанот вакили. Луисни вазиятдан келиб чиқиб, марказий ҳужумчи сифатида ҳам ўйнатишди. Қизиғи, "Бавария" Риберининг позициясига "Ливерпул"дан сотиб олган аввалги йигитда ҳам шу каби вазият юз берганди. Бироқ Маненинг Мюнхендаги фаолиятини қовушмади. Жароҳатлардан ташқари жамоанинг бошқа футболчилари янги келган сенегалликни қувонч билан қабул қилишмади. Бунга эса Садионинг маоши анча юқори бўлгани сабаб бўлганди. "Бавария" маош ва мукофот пуллари туфайли жанжал чиқиши янгилик эмас. Беккенбауэр давридан буён бу каби гап-сўзлар жамоага ҳалақит қилади. Мавсумига 25 миллион евро ишлаб топадиган Манега ҳасад қилишарди, клуб ветеранлари ҳам маоши ошишини истаб қолишди.

"Бавария" чап қанот вингери кўп чидай олмади. Мане Чемпионлар Лигаси доирасида "Манчестер Сити"га қарши учрашув куни кийиниш хонасида Санега ташланиб қолди. Бу ҳам Мюнхен клуби учун янгилик эмас. Рибери ва Роббен жанжали натижасида Франк 50 минг евро жарима тўлагани ёдингизда бўлса керак. Манега белгиланган жарима миқдори – 350 000 евро. Сенегалликнинг версияси бўйича Сане ўзига нисбатан муносабатда расизмга йўл қўйган. Аҳмоқликнинг чўққиси шундаки, Леройнинг ўзи ҳам қора танли йигитлардан. Катта эҳтимол билан Лерой Манега нисбатан норозилигини билдирганига "Бавария" мураббий ва менежерлари сенегалликнинг жаримасини икки миллион евродан қисқартиргани сабаб бўлган.

Мане Левандовски "Барселона"га кетганидан кейин "алдамчи тўққизлик" ролида ҳам, чап қанот вингери сифатида ҳам асосий таркибнинг муқим аъзоси бўла олмади. Садио Мюнхенда Бундеслига ва ЕЧЛнинг фақатгина бир мавсумида 16 та самарали ҳаракат қайд эта олди. Ундан кўпроғини кутишганди. Натижада, немислар ортиқча қийинчиликсиз "Ал Насср" таклифини қабул қилишди. Манедан бир неча йил аввал "Бавария"да Клоппнинг бошқа шогирди ўз ўрнини топа олмаганди. "Ливерпул"да Коутиньо АПЛ юлдузи даражасигача чиқди, Англиядаги охирги мавсумида ҳам у ажойиб ўйин кўрсатди. Кейин эса "Барселона" унинг трансферига 135 млн евро таклиф қилди. Инглизлар бу суммага етакчиларидан бирини қўйиб юборди.

Айнан Мане "Ливерпул"да Коутиньонинг йўқлигини билдирмаганди, Филиппе эса Каталонияда ўйнаб кета олмади. "Бавария"га ижара вақтида у Чемпионлар Лигасида зафар қучди, аммо Германия клуби бразилиялик шартномасини тўлиқ сотиб олмади. Коутиньо ҳам, худди Мане сингари ўйинида кескин пасайиш юз берди, Қатарга йўл олди ва ҳозир ватанига қайтиб, "Васко да Гама" шарафини ҳимоя қилмоқда. "Бавария"дагилар аввалги омадсиз тажрибалар Луис Диас билан такрорланмайди, деб ҳисоблашмоқда. "Бавария" тарихидаги энг қиммат харидлардан бирини расмийлаштирди. Мюнхенда фақатгина "Тоттенхэм" форварди Кейн ва "Атлетико" ҳимоячиси Люка Эрнандес учун бундан кўпроқ тўлашган.

Мусиаланинг жароҳати Кейнга ёрдамчи гуруҳга босимни оширмоқда

Жароҳат бўлмаганида Жамал ва Киммих "Бавария" ҳужуми ва уларни тайёрлашнинг турли частоталарида дирижерликни ўз қўлига олган бўларди. Германия терма жамоаси диспетчерлари Кейнга вазият яратиб бериш вазифасини яхши уддалашаётганди, аммо клублар ўртасидаги ЖЧда Доннарумма билан тўқнашувдан кейин Мусиаланинг оёғи. Жиддий жароҳат олганига қарамай, германиялик Жанлуижжини бунда айбламасликни ва ҳақоратли хатлар ёзмасликни сўради. Италиялик ўзи истамаган ҳолда рақибининг оёғига йиқилиб тушди. Мусиала жарроҳлик амалиётини бошдан ўтказди ва тикланиш жараёнини ҳам бошлаб юборди. "Бавария" энди плеймейкерсиз қолди, аммо Компани "4-3-3" тактик схемасида ҳам ўйнаши мумкин. Бунда Киммих "ўнлик" нуқтасида ҳаракат қилади.

Кейн худди "Ливерпул"да Фирмино ҳаракат қилганидек ортга қайтиб ўйнай олади. Франциялик Олисе ва колумбиялик Диас эса ҳужум марказига ўтиб, вазиятларга эга бўлади. Бу вазиятда ҳаммадан ҳам кўпроқ Гнабри ва Коман ютқазади, лекин улар баҳорда "Бавария"ни Чемпионлар Лигасида ғалабага етаклай олишмади. Жанжалкаш Сане эса "Галатасарой"га йўл олди. Турклар машҳур футболчига "ёғли" таклиф билан чиқишди. "Бавария" "Реал" вингери Родригога кўпчилик учун орзу бўлган шароитларни яратишга тайёр эди, бироқ бразилиялик Бундеслигага боришни истамади. Диасни сотиб олган немислар энди Мусиалага ўринбосар харид қилиш керакми ёки йўқ, шу масалани ҳал қилиш зарур. "Реал"нинг бошқа футболчиси Браимни ва "Лейпциг"дан Симонс номзодлари ўрганиб чиқилди.

Диас "Бавария"нинг биринчи номзоди эмас эди.Улар кўпроқ Вирц номзодига қизиқишганди. Флориан Мусиаланинг ёнига инсайд сифатида жойлашиши мумкин эди. Бундан ташқари "Бавария" Уильямсни таркибига чорлаганди. Молиявий масалалар туфайли "Барселона"га ўта олмаган Нико "Атлетик"да узоқ вақт қолишни маъқул топди. Басклар ёш чап қанот вингерини беришмади, "Ливерпул"га эса пул зарур. Луис Диас клуб тарихидаги энг қиммат учинчи трансфер (сотилган) бўлди. Ундан қимматроққа фақатгина Коутиньо ва Суареснинг трансферлари қайд этилган. Уларнинг ҳар иккиси "Барселона"га йўл олганини яхши биласиз. Колумбияликни 75 млн евро сотган "Ливерпуль" бу келишувдан, унинг нархидан албатта хурсанд бўлиши аниқ. Бироқ ҳозирги трансфер бозори шундай бўлиб қолди ва ҳозирча ҳеч ким уни тўхтатай, тартибга солай демаяпти.

"Бавария" афсонаси Мюллер ҳақ – ортиқ ҳеч нимани англатмай қўйди. 80 млн еврога сотиб олинган футболчи, ҳимоячи Эрнандес каби ўйинини топа олмаслиги мумкин, "Бавария" "Челси" мактабидан "ўғирлаб кетган" Мусиала эса қисқа вақт ичида немис чемпионинг асосий футболчисига айланиб олди. Луис Диас Бундеслигада янада кучайиши мумкин, ахир бу ерда ҳужумкор футболни хуш кўришади. "Бавария" мунтазам равишда босим уюштиради. Чап қанотдаги ўнг оёқли футболчи кўп бор марказга ўтиб, зарбалар бериши мумкин. Диас учун бу яхши келишув, лекин Англияда футболчида тартиб-интизом билан боғлиқ муаммолари бор эди. "Бавария" йиллар ўтиб, яна Рибери сингари безори йигитга ишонч билдирди.

Омонжон Тўхтамирзаев таржимаси

"Бавария" Риберининг учинчи ўринбосари учун 75 млн евро сарфлади. Бу сафар натижа қандай бўларкин?