АГМК билан Ўзбекистон кубогини қўлга киритган ва Суперлигада плей-офф ўйинлари орқали жон сақлаб қолган жамоа бош мураббийи Бахтиёр Ашурматовнинг клуб билан тузган шартномаси ниҳоясига етиш арафасида.

Йил охиригача тузилган битимни томонлар узайтиришмаган. Бахтиёр Ашурматов сайтимиз ходими Шаҳбоз Беғамовга бу маълумотни тасдиқлади ва жамоадан кетиш эҳтимолини инкор этмади.

Демак воқеалар ривожи АГМКда янги мураббий иш бошлашига қараб кетмоқда.

Ўзбекистон Кубоги соҳиби сифатида келаси йилдан ОЧЛ плей-офф ўйинлари орқали қитъанинг нуфузли мусобақасида иштирок этадиган АГМК жамоага катта тажрибага эга, юқори малакали мутахассисни олиб келиш тараддудини кўрмоқда. Айни пайтда АГМК ОЧЛда иштирок этиш тажрибасига эга ва ушбу мусобақани об-ҳавосини жуда яхши биладиган Миржалол Қосимов билан ҳам музокараларга киришгани ҳақида норасмий маълумотлар бор. Олмалиқликлар раҳбарияти жамоани Миржалол Қосимовга топширишмоқчи. Бироқ музокаралар қандай якун топиши ҳозирча номаълум.

Тасдиқланмаган маълумотларга кўра, "Навбаҳор"нинг собиқ устози Илҳом Мўминжонов ўз хизматини АГМКга таклиф этган. Шунингдек, яна бир қатор мутахассислар АГМКни бошқариш истагида жамоага ўзларини таклиф этишган. Лекин клуб раҳбарияти жамоа бош мураббийи сифатида Миржалол Қосимов номзодини илгари сурмоқда ва мутахассисни Олмалиқда ишлашга кўндирмоқчи.

Эслатиб ўтамиз, АГМК 12 февраль куни ОЧЛ доирасида ўз майдонида Тожикистон чемпиони "Истиқлол"га қарши ўйнайди.

ОЧЛ плей-офф босқичи

12 февраль
АГМК (Ўзбекистон) - "Истиқлол" (Тожикистон)

19 февраль
"Ал Насср" (Саудия Арабистони) - АГМК (Ўзбекистон) - "Истиқлол" (Тожикистон) тўқнашуви ғолиби

Бахтиёр Ашурматов АГМКдан кетишга яқин