Ҳиндистонлик Дэвид Бекхэм Элкатоҳчунго ва Роналдо Лайтонжам Сингх велоспорт бўйича Хитойда ўтказилаётган Осиё ўйинларида иштирок этишди.

Роналду сешанба кунги спринт баҳсларида жамоасига бешинчи ўринни эгаллашида ёрдам берди.

Бекхэм эса чоршанба кунги спринт баҳсларида тўққизинчи ўринни эгаллади.

"Менинг отам миллий терма жамоада ўйнаган ва Дэвид Бекхэмнинг ашаддий мухлиси эди. Онам шифохонага келганида, ўғил фарзанд дунёга келса, Дэвид Бекхэм деб исм қўйилишини айтишган. 14 ёшимгача футбол ўйнаганман, 2017 йилдан бери велоспорт билан шуғулланаман", деди Элкатоҳчунго.

Лайтонжамнинг отаси эса бразилиялик футбол сеҳргари Роналдиньо (асл исми Роналдо)нинг ашаддий мухлиси эди.

2002 йилги жаҳон чемпионати пайтида иш билан Кашмирга борган Лайтонжамнинг отаси Роналдиньонинг Англия дарвозасини ишғол қилишига баъзи дўстлари билан пул тиккан, якунда бразилиялик футболчи гол уриб, жамоасининг 2:1 ҳисобида ғалаба қозонишига ҳисса қўшган. Учрашув якунланганидан бир неча дақиқа ўтгач, отанинг телефони жиринглаб, деярли 2000 км масофа нарида фарзанди дунёга келгани ҳақида хабар беришган.

"Роналдиньо тепган тўп дарвозага киргач, дунёга келган бўлсам керак. Ўша куни отам мўмайгина пул ютиб олган. Шу боис бўлса керак, машҳур исмга эга бўлдим. Бу мен учун омадли ҳисобланади", деди ҳиндистонлик спортчининг ўзи.

Бекхэм ва Роналдо Осиё ўйинларида иштирок этди