Ёш ҳужумчи ушбу клубнинг АҚШда очилган академиясида таҳсил олган. Биз футболчидан интервью олишга қарор қилдик.

- Миллионлар ўйини футболга қандай кириб келганлигингиз ва биринчи мураббийингиз ким бўлганлиги ҳақида гапириб берсангиз.
- Ёшлигимдан миллионлар ўйинига бўлган қизиқишим кўчлик бўлганлиги сабабли Тошкентда, Наманганда маҳаллаларда ўртоқларим билан футбол ўйнаб юрардим. 9 ёшимда оилам билан Америка Қўшма Штатларига кўчиб келганимизда ҳам футболсиз ҳаётимни тасаввур қила олмаганман ва Америка клубларида футболни сир асрорларини ўргана бошладим. 17 ёшимда Ўзбекистонга қайтиб Азамат Абдураимов қўл остида шуғуллана бошладим. Сўнгра бир йил "Андижон" жамоасида туп тепиб яна Америкага қайтдим ва Аргентинанинг "Бока Хуниорс" жамоасининг АҚШда очилган академиясига бордим. У ерда Волд Морд қўл остида ўйнадим.

- "Бока Хуниорс"да қайси ампулада ҳаракат қилгансиз?
- У ерда мураббий мени деярли барча позицияларда синаб кўрди. Охири сен ҳужум ортида ўйнасанг жамоага кўп фойданг тегар экан, ҳаракатларинг тўп узатишларинг, гол уришларинг яхши чиқаркан деб, мени қанотларда ҳужумчи ортида ярим ҳимоячи сифатида ишонч бера бошлади. Шундан бери иккала қанотларда ҳам бемалол ҳужумчи ортида ўйнаб юрибман.

- "Бока Хуниорс" билан шартномангиз қачон якунланди?
- Ушбу клуб билан шартномам якунланиб бўлди ва айни пайтда эркин агентман

- Ҳозирги кунда таклифлар бўляптими?
- Ҳа, ҳозирги кунда Туркия, Таиланд ва Малайзия клубларидан таклифлар бор.

- Сир бўлмаса айнан қайси клублардан таклиф бўлди?
- Ҳозирча буни айта олмайман. Сабаби олдимда 3-4та клублардан жиддий таклифлар бор. Агар бирор-бир клуб билан келиша олсам албатта хабарини бераман. Лекин маълумот сифатида шуни айта оламан. Менга TFF биринчи лигасидан таклифлар бўлмоқда.

- Яна Ўзбекистон футболига қайтсак. Ўтган мавсумда сизга Наманганнинг "Навбаҳор" жамоасидан таклиф бўлганди ва сиз маълум муддат ушбу жамоа кўригида бўлдингиз якунда эса шартнома имзоламадингиз. Бунга сабаб нима бўлди?
- Тўғри ўтган йили мен Тошкентга дам олишга боргандим. Америкага қайтишимга 5-6 кун қолганида мен яшаган Ўзбекистон меҳмонхонасига "Навбаҳор" жамоаси ташриф буюрди. Улар қишки йиғинни Тошкентда ўтказишни режалаштиришган экан. Ёшлигимда "Навбаҳор"га қизиқишим юқори бўлган. Менда ҳам "Навбаҳор"да тўп тепиш орзуси бўлган эди. Биласиз, "Навбаҳор" мухлислари Ўзбекистонда етакчи ҳисобланади. Шунинг учун, спорт формамни сақлаб туриш мақсадида мен жамоа бош мураббийи Илҳом Мўминжонов олдига бориб, жамоа билан шуғулланиб туриш учун рухсат олгани бориб, агар менга "Навбаҳор" учун эҳтиёж бўлса Ўзбекистонда қолиб фаолиятимни ўзимни она шаҳрим Наманганда давом эттиришимга қарши эмаслигимни айтдим. Илҳом Мўминжонов рози бўлиб, мени жамоасида шуғулланишимга рухсат берди. Мен Америкага қайтишимдан бир кун аввал Мўминжонов билан гаплашганимда ҳаракатларим яхши эканлигини лекин клубга легионер футболчи олмасдан асосан маҳаллий ўйинчилар хизматидан фойдаланмоқчи эканлигини айтди. Шундан сўнг, бир биримизга омад тилаб илиқ хайрлашдик.

- "Навбаҳор" жамоасини ижтимоий тармоқларда кузатиб борасизми?
- Ҳа. "Навбаҳор"ни ва ўзбек футболини ижтимоий тармоқларда кузатиб бораман. "Навбаҳор" бу мавсумда мазмунли ўйин кўрсатиб 5-ўринни олиб, мухлисларини хурсанд этди.

- Агар "Навбаҳор"дан бу мавсумда сизга таклиф тушса рози бўлармидингиз?
- Ҳозирча Бир нарса дея олмайман. Сабаби олдимда 3-4та таклифлар бор, қолаверса ҳужжат ишларим шу кунларда якунига етса кейин бу ҳақда ўйлаб кўраман. Агар "Навбаҳор" раҳбарияти ва бош мураббийи жиддий таклиф билан чиқишса, менинг жамоага фойдам тегишини хоҳлашса катта эҳтимол билан фаолиятимни Наманганда давом эттиришим мумкин. Ҳозирча эркин агентман. Ҳужжат ишларим якунланиши билан олдимдаги вариантларни кўриб чиқаман.

- Масаланинг иккинчи томони бор Аргентинада бериладиган маош билан "Навбаҳор"ни маошини фарқи бўлса ҳам.
- Мен "Навбаҳор"га пул учун бориш ниятида эмасман. Ягона орзуим ўз шаҳримнинг бош жамоасини ОЧЛга чиқиш учун ўз хиссамни қўшиш. Пул қўлни кири бир келади бир кетади. Лекин пул ватанимни ва шаҳримни обрўси учун роль ўйнамайди.

- ЎФФ призиденти раҳбарияти янгиланди. Қисқа вақт ичида футболга оид янги қарорлар чиқаяпти. Хабарингиз бўлса керак 2018 йилдан бошлаб супер лигада жамоалар сони 12тага қисқартирилди. Сиз нима деб ўйлайсиз тўғри қарор қабул қилиндими?
- Энди нима дейишим мумкин. ЎФФга ҳаракатчан раҳбарлар келишди деб уйлайман. Сабаби улар ўзбек футболи ривожи учун ҳаракат қилишяпти. Бу қарорни чиқариб, тўғри қилишгандур. Чунки шу қарор юзасидан ўзбек футболида ўзгаришлар кузатилар. Сабаби про-лигага тушиб кетган тўрт жамоа Суперлигага чиқиш учун курашишса, Суперлигадаги жамоалар про-лигага тушмаслиги учун ҳаракат қилиб, ҳар бир очколар олтинга тенг бўлади деб ўйлайман.

- Қайси чет футболчиси ўйинларини кузатиб борасиз?
- Мен ёшлигимдан Роналдиньонинг ўйинларини кузатиб борардим. Унинг тўп билан ҳаракатлари менга маъқул келарди.

- Ўзбекистондаги мухлисларга тилакларингиз?
- Ўзбек футболини ривожланишига айнан шу мухлисларнинг хиссаси катта. Жамоалари ютқазиб қўйса ҳам ёлғизлатиб қўймай ҳар бир ўйинга ташриф буюриб жамоаларига далда бўлишади. Бундай жон қўяр мухлислар кўп бўлсин. Ўзбекистон терма жамоаси ҳам шу мухлислар учун борини бериб ҳаракат қилиб жаҳон чемпионатига чиққанда ҳам мухлислар ҳақиқий 12-ўйинчи вазифасини бажаришда чарчашмасин.

Ҳусанбой Алиев суҳбатлашди

"Бока Хуниорс"да ўйнаган ўзбекистонлик футболчи билан суҳбат