Йиғин доирасида кончилар анъанавий “Вилоят ҳокими кубоги” турнирида муносиб иштирок этди.

Бугун, яъни 8 февраль куни “Қизилқум” жамоаси мураббийлар штаби ва аъзолари Навоий шаҳрига етиб олдилар. Навоийликлар учун 12 февралга қадар қисқа муддатли таътил эълон қилинди.

Фурсатдан фойдаланиб, “Қизилқум” ПФК бош менежери Ҳамиджон Актамов, жамоа хомийлари — Навоий кон металлургия комбинати (бош директори Қувондиқ Саноқулов), “Қизилқумцемент” ҳиссадорлик жамияти (раиси Рустам Айходжаев) раҳбарлари Навоий вилояти ҳокими, вилоят футбол федерацияси президенти Эркинжон Турдимов қабулида бўлишди.

Унда футбол клуби раҳбари Ҳамиджон Актамов жамоанинг янги мавсум олдидан кўраётган ҳозирлиги, галдаги вазифалар ва режалари юзасидан ахборот берди.

Навоийда кучли ва рақобатбардош жамоани шакллантириш йўлида олиб борилаётган ишлар ва яратилаётган шарт-шароитлар бўйича хомийларнинг маълумоти тингланди.

Учрашув охирида вилоят ҳокими Э. Турдимов мухлисларнинг “Қизилқум” жамоасидан умидлари катта эканлигини алоҳида таъкидлар экан, яқин кунлар ичида жамоа аъзолари билан учрашишларини алоҳида билдириб ўтдилар.

Эслатиб ўтамиз, “Қизилқум” жамоаси 12 февралдан Тошкентда йиғилади ва навбатдаги ўқув-машғулот йиғинига киришади.

Бош менежер Ҳамиджон Актамов вилоят ҳокими қабулида бўлди