Олий лига, 27-тур. 4 ноябрь
15:30 - “Олмалиқ” (Олмалиқ) – “Шўртан” (Ғузор)
Ҳакамлар: З. Қодиров (Навоий), Р. Фозилов (Наманган), М. Мажидов (Наманган), Д. Клепиков (Тошкент)
Назоратчи: Г. Имомов (Тошкент)
ЎзПФЛ вакили: В. Лёткин

"Олмалиқ" навбатдаги турни ўз майдонида ўтказади. Жамоа 35 очко билан 9-ўринни эгаллаб турибди. "Шўртан" эса ҳозирча 23 очко тўплаб, 15-ўринда бормоқда.

"Олмалиқ"нинг иккинчи даврадаги ишларини кўп ҳам зўр деб бўлмайди. Негаки жамоа шу пайтгача фақат уч бор ғалабага эришди. Виктор Кумиков шогирдлари бунгача "Сўғдиёна", "Обод" ва "Машъал" клубларидан устун келган. Учала ғалаба ҳам Олмалиқдаги ўйинларда қўлга киритилган.

Биласизми? Ғузорда кечган биринчи давра ўйинида "Олмалиқ" рақибидан 1:0 ҳисобида устун келган. Эндиликда томонлар Олмалиқ шаҳрида ўз кучларини синаб кўришади.

Факт: "Олмалиқ" иккинчи давра бошланганидан бери ўз майдонида фақат икки бор мағлуб бўлди. Жамоа "Локомотив" ва "Нефтчи"га имкониятни бой берган. "Шўртан" ҳақида тўхталадиган бўлсак, бу жамоа хавфли зонада турибди ва катта эҳтимол билан кейинги йилни биринчи лигада ўтказса керак. Агар олий лигада 12та жамоа аниқ қоладиган бўлса, "Шўртан"га жой етмай қолади.

Шундай бўлдики, "Шўртан" қаторасига саккиз ўйинда ғалаба қозона олмади: еттита мағлубият ва бир дуранг. Жамоа иккинчи даврада иккита ғалабага эришган, иккаласи ҳам уйда - "Динамо" ва "Сўғдиёна" клублари устидан қўлга киритилган.

Факт: "Шўртан" кетма-кет бешта ўйиндан бери рақиблар дарвозасига тўп киритишни уддалаб келяпти.

Биласизми? "Шўртан" сафар ўйинларида ҳали ғалаба қозонмаган олий лиганинг ягона жамоаси бўлиб турибди.

Бугун футбол. "Олмалиқ" - "Шўртан"