Миллий жамоанинг мундиалолди йиғинидан келиб чиқиб, 5 майдан эътиборан Суперлига катта танаффусга чиқади. Ўртадаги бўшлиқни тўлдириш мақсадида Лига ва клублар ўзаро келишган ҳолда 8-26 май саналари оралиғида Ўзбекистон кубогининг гуруҳ босқичини ўтказишга қарор қилди. Эндиликда клуб миллий жамоа йиғинига қанча футболчисини беришидан қатъи назар, кубок ўйинини ўтказади.
Ўз футболчиларини терма жамоа ихтиёрига жўнатаётган клублар манфаатидан келиб чиқиб, жорий мавсум кубок гуруҳ босқичига қуръа ташлаш олдидан иштирокчилар Ўзбекистон кубоги регламенти асосида саватчаларга бўлиб чиқилган. Шу тариқа бир саватчадан жой олган клублар гуруҳ босқичида ўзаро рақиб бўлмайди. Шунингдек, дастлабки саватчадан жой олган саккиз клуб ҳар қандай ҳолатда ҳам гуруҳ босқичи доирасидаги икки учрашувни ўз майдонида қабул қилади.
Гуруҳнинг қолган уч иштирокчиси тўп сурадиган уй-сафар ўйинлари масаласи қуръа ёрдамида аниқлаб олинади. Демак, иккинчи, учинчи ва тўртинчи саватчалардан фақатгина биттасига икки учрашувни ўз уйида ўтказиш насиб қилади. Қолган икки сават вакиллари эса икки учрашувни сафарда ўтказишига тўғри келади.
Қуръа жараёнида дастлаб тўртинчи саватчадан жой олган клубларнинг тақвимдаги ҳолатига аниқлик киритилади ва ўз навбатида улар гуруҳларга тақсимлаб чиқилади. Мос кетма-кетликда учинчи, иккинчи ва энг сўнгида биринчи сават клублари гуруҳларга жойлаштирилади.
Қуръа жараёни 15:00 да старт олади ва у Лиганинг расмий саҳифалари орқали жонли намойиш этилади. Ҳар бир саватча клубларини гуруҳларга жойлаштириш учун алоҳида меҳмон таклиф этилган бўлиб, Лига бунда медиа соҳаси вакилларига эътибор қаратишни лозим топди.
