"Вердер"нинг айни дамдаги ишлари яхши эмас. Флориан Кофельдт шогирдлари 18 очко жамғарган ҳолда жадвалнинг 17-ўрнида боришмоқда. Элитада қолиш мақсадида бўлган жамоанинг битта захира ўйини мавжуд ("Айнтрахт", 24-тур).

"Фармацевтлар"да эса ҳолат бироз бошқачароқ. Жорий йил ЧЛда гуруҳ босқичидан нарига ўта олмаган жамоа келаси йил ҳам Европанинг энг нуфузли клублари мусобақасида қатнашиш ҳаракатида. "Байер" бу йўлда жиддий рақобатга киришган. Аммо, кучли тўртлик учун имконият бой берилган тақдирда ҳам, леверкузенликлар еврокубокларсиз қолишмайди.

"Байер" мавсум рестартини меҳмондаги ўйин билан бошласада, бунинг ижобий тарафлари ҳам йўқ эмас. Мезбон Бремен жамоаси ўз майдонида очко тўплаш бўйича энг ёмон кўрсаткичга эга. Бременликлар 11та уй учрашувида ўтказиб атиги 5 очко тўплашган ва 26та гол ўтказиб юборишган. Шу ўринда айтиш керакки, леверкузенликлар ўз навбатида, меҳмондаги ўйинларда энг яхши иштирок этаётган Топ-4 жамоалар орасида. "Фармацевтлар" 12та ўйинда 22 очко тўплаб, рақиблар дарвозасини 12 бор ишғол қилишган.

"Вердер" 14 йил давомида жамоа билан ижобий натижалар қайд этган Томас Шаафдан сўнг яна ўз тизимидан мураббий топишга қарор қилди. Бундай мутахассис истеъфодан қўрқмаган ҳолда жамоа билан узоқ вақт ишлайдиган мураббий бўлиши лозим эди. 2017 йилда бременликлар устозига айланган Флориан Кофельдт айнан шундай эди. У ўрганади, хатоларни тан олишдан қўрқмайди, уринади ва изланади, асосийси ишлайди. Аммо, Бундеслигада жуда камтар таркибга эга бўлган мураббий учун бу илк катта синовдир.

"Байер" устози эса ўйиндан олдин Ларс Бендердан "айрилди". Футболчи тўпиғидаги жароҳат сабаб бугун жамоасига ёрдам бера олмайди. Унинг ўрнига эса 17 ёшли ҳужумкор ярим ҳимяочи Флориан Виртц қайдномадан ўрин эгаллаган. Ёш ўйинчи Бошда катта таассурот қолдирди, аммо унга асосий жамоада мунтазам ўрин йўқ, ҳозирча.

ГЕРМАНИЯ БУНДЕСЛИГАСИ ТУРНИР ЖАДВАЛИ

Маълумот учун, Бременнинг "Вердер" жамоаси Бундеслигада энг кўп ўйин ўтказган жамоа ҳисобланади - 1890 та учрашув.

Тахминий таркиблар

"Вердер" ҳимоядаги муаммоларни бартараф этиш учун декабрь ойидан 3-4-3 схемасига ўтган. "Байер" эса мавсумда уч ёки тўрт нафар ҳимоячи билан ўйнаб келмоқда.

Демак, бугун соат 23:30. Рестарт олган Бундеслига 26-турининг сўнги учрашуви. Ўтказиб юборманг!

Бундеслига "отахони" турни якунлаб беради (Превью)