Гарчанд стадионга "Миллий" номи осиб қўйилган бўлсада, ҳужжат ва мухрларда расман ҳамон "Бунёдкор" стадиони сифатида қайд этилиб келинаётганди. Республикамизнинг бош ареналаридан бири яна ўз номи билан аталиши мумкин.

Шунингдек, стадион маъмурияти томонидан очилган пуллик футбол тўгараги ҳам бекор қилиниши мумкин. Бу ҳақда стадиондаги манбамиз хабар берди.

ЎФАдаги яқин манбамизга кўра, тез орада стадион директори сифатида ишлаб келаётган Козим Ўринбойхўжаев ҳам лавозимини бўшатади.

Эслатиб ўтамиз, ЎФАда Умид Аҳмаджонов раҳбарлиги даврида "Бунёдкор" Стадион бинолари ва иншоотларидан фойдаланиш дирекцияси раҳбари лавозимига Козим Ўринбойхўжаев тайинланганди.

Шундан сўнг ПФЛ ташкилоти ҳам айнан мазкур стадион ҳудудига кўчиб ўтганди.

Айни пайтда стадион раҳбарлигига "Бунёдкор" клубида фаолият юритиб келаётган ва айнан мазкур стадионнинг қурилишидан бошлаб 2018 йилга қадар ўйингоҳга масъуллардан бири бўлган Даврон Шоқурбонов номзоди ҳам мавжуд. Катта эҳтимол Даврон Шоқурбонов "Бунёдкор" стадиони директори этиб тайинланиши мумкин.

Қайд этиш жоиз, Даврон Шоқурбонов кеча ЎФА вице президенти Равшан Эрматовнинг терма жамоалар бош мураббийлари билан учрашувида қатнашган ва маълум бўлишича, Шоқурбонов айнан майдон масалалари бўйича жавобгар сифатида мазкур учрашувда иштирок этган.

"Бунёдкор" стадиони яна ўз номи билан аталиши мумкин, директор ҳам ўзгаради