ЯНГИЛАШ

Ла Лига, 17-тур.

Реал Мадрид – Барселона 0:3

«Сантьяго Бернабеу»

Голлар: Суарес (54), Месси (64-пенальтидан), Видаль (90)

Реал – Навас, Варан, Марсело, Карвахаль, Рамос, Ковачич (Бэйл, 72), Каземиро (Асенсио, 72), Модрич, Кроос, Бензема (Начо, 66), Роналду.

Барселона – тер Стеген, Вермален, Пике, Альба, Паулиньо (Андре Гомеш, 84), Серджи Роберто (Алеиш Видаль, 90), Бускетс, Ракитич, Иньеста (Нелсон Семеду, 77), Месси, Суарес.

Огоҳлантиришлар: Вермален (18), Рамос (59), Марсело (83), Бускетс (88).

Четлатиш: Карвахаль (63).

Учрашув шарҳи:

- Демак ўйин бошланди!

- Айни пайтда "championat.asia" сайти офисида бутун ижодий гуруҳ билан ушбу фантастик баҳсни кузатиб бормоқдамиз. Меҳмонимиз ТФФ вице-президенти, собиқ "CA"чи Нодирхўжа Юлдашев.

Толибжон Қосимов "Реал"нинг дастлабки ҳужуми ҳақида: "МЮдан чиққан шунқор бугун "Барселона"ни жазолайди. "Реал" яхши бошлади.

"Реал" гол урди, Роналду тўп муаллифи. Лекин лайнсмен байроқчаси билан оффсайд қайд этди.

"Реал"га бефарқ бўлмаган Ла Лигага ихтисослашган журналист Омонжон Тўхтамирзаевга Роналдунинг "аут" отиши, яъни тўпни ён чизиқдан ўйинга киритиши ёқмаяпти.

Жасур Асланов анча жиддий қиёфада учрашувни кузатмоқда. "Барселона" эса хотиржам, шошилмаяпти. Турнир жадвалида ҳам анча хотиржамлик кузатилаётгани каталонияликларнинг ўйинига таъсир қилаётганга ўхшайди.

"Барселона" 8-дақиқада илк позицион ҳужумга ўтди. Лекин уларнинг ҳужуми ўйиндан ташқари туфайли ниҳоясига етмай қолди.

11-дақиқа: Роналду жуда қулай вазиятни кўкка совурмоқда. Роналду тўпга зарба бериш чоғида адашди.

Ҳа-я, айтганча, "Барселона" класикода классик тактик схемада ўйнамоқда: 4-4-2. "Реал" эса 4-1-3-2 схемасини танлаган.

Жасур Аслановнинг фикрича, "Барселона"нинг бахтига Бензема "Реал"да ўйнайди ва бугун асосий таркибда.

Жаҳонгир Сотиволдиев "Реал"нинг йирик ғалабасини тахмин қилмоқда. Айни пайтда майдонда "Реал" ҳудудий устунликка эга.

"Реал" тезкор ҳужумга ўтаётганда Вермален Лука Модрични қоидани бузган ҳолда тўхтатиб қолди. Керакли пайтда керакли фол.

Шаҳбоз Беғамов: "Олий лигани гапиришади, Ла Лига учрашувларини бошланиш вақти ҳам мантиққа тўғри келмайди. Шундай муҳим ўйин ҳам маҳаллий вақт билан соат 13:00да бошланадими?"

График бўйича айни пайтда ҳар иккала жамоа футболчилари тушлик қилишлари керак. Ла Лигада тартиб-интизом йўқ шекилли?
(c) Шаҳбоз Беғамов

Ўйин ростан ҳам жуда зерикарли ўтмоқда ҳозирча.

Нарзулла Сайдуллаевнинг айтишича, "Эвертон" - "Челси" ўйини бундан қизиқроқ бўлса керак. "Эль класико"да эса гол бўлмаслигини тахмин қилмоқда Сайдуллаев.

ЎзРепортдаги русча шарҳ ўйиндан ҳам зерикарли бўлаётганини таъкидламоқда Жасур Асланов.

Офисда сайтимизнинг русча таҳририяти аъзоси Марат Аксанов ҳамкасби Жасур Асланов мурожаат қилмоқда: "Месси қани?"

Қаймоқрангга бурканган Жаҳонгир Сотволдиев "Реал"нинг ҳужумларини эҳтирос билан кузатмоқда.

Ўйин бироз жонланди. Жамоалар навбати билан ҳужумга ўтишмоқда. Месси фаоллашди. Роналду рақиб жарима майдончаси ичида тинмаяти. Бензема эса жамоаси ҳужумларини "бузиш" билан банд.

Мадридда соат 13:45. Жамоалар кечиккан "тушлик"ка йўл олишди. 15 дақиқадан кейин эса улар бизга "десерт"ни тақдим этишларига ишониб қоламиз.

Ҳозирча танаффус! Голдан эса дарак йўқ.

Иккинчи тайм бошланди!

Вингерларсиз ўйнаётган ҳар иккала жамоаларнинг қанотлари фаол эмас.

Тактик курашда Зиданнинг ўйлаб қўйган режалари амалга ошадими ёки Вальверде айёрроқ чиқадими? Кузатамиз.

Биринчи бўлимда асосан "Реал" ўйинни назорат қилганди. Танаффусдан кейин ўйин тизгини "Барселона" қўлига ўтмоқда.

Гол! Луис Суарес! "Барселона"нинг учбурчак ҳужуми голга айланди!

"Барселона"дан ажойиб ҳужум! Бускетс-Ракитич-Роберто "учбурчаги" ташкил этган ҳужумни Луис Суарес самарали якунлади ва биргина зарбаси билан таблодаги ҳисобни очилишига сабабчи бўлди.

"Реал", Зидан энди ҳужумкор услубга қайтиши шарт. Буёғига бошқа чора йўқ. Акс ҳолда чемпионлик учун кураш бугуноқ ростан тугаши мумкин.

Ўйин кескинлашмоқда, эътирозлар, тортишувлар бошланмоқда. "Реал" буёғига янада агрессив ўйин кўрсатади. Айнан шу йўл билан улар "Барса"ни издан чиқаришга ҳаракат қилишлари аниқ. Чунки "Барселона" бутун мавсумни бугунги ўйингидек жуда хотиржамлик билан ўтказмоқда.

"Барселона"нинг ажойиб комбинацион ҳужуми ва Луис Суареснинг голи телеграмдаги каналимизда чиқди. Бемалол томоша қилиб, завқ олишингиз мумкин: ВИДЕО

"Барселона" "Реал"ни истаганича қийнамоқда! Ажойиб ҳужум, кетма-кет зарбалар... Дарвоза устуни, тўсини, Карвахалнинг қўли... ва Қизил! Пенальти!

Гол! Месси пенальтидан ҳисобни 0:2га етказмоқда.

"Барселона" бугун Мадридда, "Сантьяго Бернабеу"да норасмий чемпионликни нишонлашни режалаштириб келган кўринади.

Месси "Эль класико"да гол уриш бўйича рекордни янгиламоқда. Аввалги рекорд ҳам ўзига тегишли эди, бугун эса ўша рекордини яна янгилади. Пенальтидан урилган тўп Мессининг "Реал"га қарши ўйинлардаги 25-голи сифатида қайд этилди.

Шаҳбоз Беғамов: "Барселона", тўпни чиқарақол, Зидан ўзгаришларини амалга ошириб олсин".

Жасур Асланов Роналдуни қидириш билан банд.

Телеграмдаги каналимизда Мессининг голи ҳам чиқди. Томоша қилишингиз мумкин: ВИДЕО

ФАКТ: Айни пайтда "Барселона"нинг майдондаги энг кам (6,8) балл олган футболчиси ҳам Роналдудан (6,5) кўпроқ балл олган.

Лионель Месси Европа миллий чемпионатларида битта клубда гол уриш борасида мутлоқ рекордчига айланди. Бугун Месси "Барселона" сафидаги ўзининг 526-голини урди.

Ўйин тугашига саноқли сониялар қолганида "Барселона" "Сантьяго Бернабеу"даги таблодаги ҳисобни йириклаштирди. "Реал"ни уялтирди. Гол муаллифи: Алеиш Видаль.

Ўйин тугади!

"Барселона" Мадридда "Реал"ни тор-мор келтирди!

Мадридда "Барселона" "Реал"ни тор-мор келтирди