Ўзбекистон Республикаси Президентининг 2019 йил 4 декабрдаги “Ўзбекистонда футболни мутлақо янги босқичга олиб чиқиш чора-тадбирларлари тўғрисида”ги ПФ–5887-сонли Фармони ҳамда Ўзбекистон Республикаси Жисмоний тарбия ва спорт вазирлиги, Ўзбекистон Футбол ассоциацияси ҳамда Ўзбекистон Республикаси Маҳалла ва оилани қўллаб-қувватлаш вазирлигининг қўшма қарори ижросини таъминлаш мақсадида Тошкент шаҳар Жисмоний тарбия ва спорт бошқармаси томонидан маҳалла ёшлари ўртасида “Чарм тўп” футбол мусобақасининг Тошкент шаҳар финал босқичи ўтказилди.

Мазкур мусобақанинг финал учрашуви Миробод туманида жойлашган Спорт ўйинлари ва енгил атлетика бўйича ихтисослаштирилган болалар-ўсмирлар спорт мактаби майдонида бўлиб ўтди.

Анъанавий тарзда ўтказиб келинаётган “Чарм тўп” футбол мусобақасининг Тошкент шаҳар ғолиб жамоаси ҳам аниқланди.

Финал учрашувида пойтахтнинг Миробод тумани ёшлари Юнусобод туманининг ёш маҳалла футболчиларига қарши ўзаро майдонда тўп сурдилар.

Асосий вақт мобайнида ҳар иккала жамоанинг дарвозалари ишғол этилмагач, ғолибни аниқлаш футбол лотереяси яъни пенальтилар серийасига қолди. Пенальтилар натижасига кўра Миробод тумани ёшлари юнусободлик ёшлар устидан 5:4 ҳисобида ғолибликни қўлга киритди.

Шу тариқа Миробод туманининг маҳалла ёшлари жорий йилнинг ноябрь ойида ўтказиладиган “Чарм тўп” футбол мусобақасининг Республика босқичида пойтахт шарафини ҳимоя қилиш имкониятини қўлга киритди.

Мусобақа сўнгида ғолиб ва совриндор бўлган жамоалар Тошкент шаҳар жисмоний тарбия ва спорт бошқармаси томонидан диплом, медаль ҳамда кубок билан тақдирланди.

ЎзМУ талабаси Ачилдиева Умида тайёрлади

“Чарм тўп-2020” мусобақасининг Тошкент шаҳар ғолиб жамоаси маълум бўлди