Аббос Файзуллаев тўп тепаётган ЦСКА клубида мураббийлар алмашинуви юз берди. Сербиялик мутахассис Марко Николич расман жамоани тарк этди. У 2024 йил июнида жамоани қабул қилиб олган эди.

Ҳамюртимиз Николич қўл остида ўтган мавсумда РПЛ ва Россия Кубогида жами 39та учрашувда майдонга тушиб, 3та гол ва 8та ассист қайд этди. ЦСКА мавсум якунларига Россия чемпионатининг бронза медалларини ва Россия Кубогини қўлга киритди.

Янги бош мураббий ҳақида

Марко Николичдан кейин вакант қолган позицияни катта эҳтимол билан 49 ёшлик Фабио Челестини эгаллайди.

Челестининг сўнгги жамоаси "Базель" клуби эди. Файзуллаевнинг бўлажак устози ўтган мавсумда "Базель"ни 2017йилдан илк маротаба Швейцария чемпионига айлантирди. 2021 йили эса "Люцерн" клуби билан Швейцария Кубогида зафар қучган. Мутахассис бунга қадар "Сьон", "Люцерн", "Лозанна", "Лугано" ва "Террачина" клубларида фаолият юритган.

Футболчилик фаолиятини эса асосан Франция ва Испания клубларида ўтказган. "Марсель", "Труа", "Хетафе" ва "Леванте" жамоаларида сафида жами 100тадан кўп ўйин ўтказган.

2023 йил октябрида "Базель"да инқироз даври эди, Швейцария гранди мусобақа жадвалида сўнгги ўринда бораётган чоғи Фабио Челестини клубни қўлга олди ва тез орада яхши "кризис менежер" эканлигини исботлай олди. Аввалроқ айтиб ўтганимиздек, "Базель" ўтган мавсумда 2017 йилдан илк бор чемпионат олтин медалларини қўлга киритди ва Кубок баҳсларида ғолиб чиқди. Шунингдек, Челестини яқин ўтмишдаги ёрқин ўйинлари билан ёдда қолган Жердан Шакири қайта кашф этди. Мураббий Шакирини "десятка" позициясига ўтказди ва ҳимоядаги вазифаларидан озод қилди. Натижада 33 ёшли тажрибали футболчи ўтган мавсумда 21та гол урди ва 22та голли қайд этди. Шу билан бирга, Челестини ёш ўйинчиларга фаол ишонч билдириши билан машҳур. Ўтган мавсум "Базель"да энг кўп ўйин амалиётига эга бўлган футболчилар ўнталигига 21-23 ёшли футболчилар жой олишган. Швейцариялик мутахассиснинг ушбу жиҳати, шубҳасиз, Аббос Файзуллаевга қўл келиши мумкин.

Челестини услуби

Челестини 4-2-3-1 тактикасини деярли мукаммал даражага етказди. "Базель" Челестини қўл остида кетма-кет учта ўйинда рақиблар дарвозасига бештадан гол уриб, миллий рекорд ўрнатган. Умуман олганда, жамоа Швейцария Суперлигасининг 38 ўйинида 91 та гол урди. Ҳар бир ўйинда ўртача 2.4та гол. Ўтган мавсумда керакли паллада "Базель" асосий тактикасидан воз кечиб, айрим учрашувларда уч марказий ҳимоячи билан ҳам ҳаракатланди.

Челестини услуби Файзуллаев каби креатив ҳужум чизиғи вакилларига қўл келиши мумкин. Дриблинг, тезкорлик ва ноодатий фикрлаш қобилиятига эга Аббос Файзуллаев қанот вингери ёки "десятка" позициясида фойдаланиши мумкин. Челестини ёш футболчиларга ишонч билдиришини ҳисобга олсак, Аббос Файзуллаев катта эҳтимол ҳужумдаги асосий фигуралардан бирига айланади.

Абдулвосит Бектемиров тайёрлади

ЦСКАда мураббийлар алмашинуви. Энди Файзуллаевнинг ЦСКАдаги фаолияти қандай кечади?