"Арсенал" битта рельсга тушиб олди: 9 ўйиндан бери ютқазмаяпти (7 ғалаба, 2 дуранг) ва ҳозир АПЛда 6-ўринда бормоқда.

10-тур доирасидаги "Лестер"га қарши баҳсда Артета жамоасидан голларни Габриэл Магальяэс ва Эмиль Смит-Роу урди – аммо учрашувнинг асосий қаҳрамони Лондон клубига августда келиб қўшилган ва тезда Бернд Ленони захирада михлаб қўйган "Арсенал" посбони Аарон Рэмсдейл бўлди.

23 ёшли кипер деярли ҳамма зарбаларни қайтаришга эришди – рақамлар буни яққол исботлайди.

- Рэмсдейл Премьер-лигада сэйв намойиш қилиш борасида шахсий рекордини ўрнатди (8 та!). Улардан 4 таси биринчи таймнинг ўзига тўғри келди – бу эса 2021/22 йилги мавсумда АПЛ дарвозабонлари орасидаги энг яхши кўрсаткич.

- "Арсенал" дарвозаси томон 6 ўйинчи зарба йўллади – улардан ҳеч бири англияликни хафа қила олмади

Жонни Эванс (1 марта)

Юри Тилеманс (1)

Харви Барнс (3)

Жеймс Мэддисон (1)

Келечи Ихеаначо (1)

Адемола Лукман (1)

- Энг моҳирона сэйв Мэддисоннинг зарбасидан кейин кузатилди – Рэмсдейл танаффус олдидан ақл бовар қилмас маҳоратини кўрсатди. Барчасини фотосуратларда томоша қилишингиз мумкин.

Ҳолат мана бу ракурсдан янада ҳайратланарли кўринади

Бундай қутқарувларнинг классик атрибути – рақибларнинг ҳайратда қолган мураббийи. Брендан Рожерс бошини ушлаб олди – у Европа лигасида бунақасини аниқ кўрмаган.

"Лестер" мураббийи ўйиндан кейин Рэмсдейлни мақтади: "У бир нечта ажойиб сэйвларни амалга оширди. Ҳакам тўп дарвоза чизиғини кесиб ўтганини қайд этишини кутдик, икки марта шундай ҳолат бўлди. Дарвозабон "Арсенал"га "қуруқ" ўйин келтирди".

Петер Шмейхель Twitter'да буни "йил сэйви" деб атади – "Манчестер Юнайтед" афсонаси "Арсенал" киперини шу тариқа руҳлантирди

- "Лестер" кўп кўрсаткичлар бобида устун эди, аммо "Арсенал" дарвозабони зарбаларни устамонлик билан қайтариб, ўйиннинг энг яхши футболчиси номига сазовор чиқди.

- Рэмсдйел ушбу мавсумда АПЛ 7 ўйинида 4 та "қуруқ" ўйин ўтказди – "Арсенал" у билан 6 та ғалабага эришди.

- Аарон АПЛ жорий мавсумида 28 зарбадан 24 тасини тўсди – 85,7% ишончли ўйин. Лига дарвозабонлари орасида фақат Эдуар Менди ундан кучли (89,7%).

Ўйин тугагач, посбон трибуна томон юугурди ва мухлислардан бирига футболка совға қилди – у нафақат қойилмақом сэйви билан, балки қиймати юқори ҳадя билан ҳам қувонч бағишлади.

Шундай қилиб, Аарон Рэмсдейл "Арсенал" ишқибозларининг асосий ёқимтойига айланди.

Лестер – Арсенал 0:2
«Кинг Пауэр»
Голлар: 0:1 – 5 Габриэл, 0:2 – 18 Смит-Роу.
Лестер – Шмейхель, Кастань, Эванс, Амарти (Барнс, 46), Союнжу, Томас, Тилеманс, Мэддисон (Дака, 71), Сумаре, Варди, Ихеаначо (Лукман, 46).
Арсенал – Рэмсдейл, Томиясу, Габриэл, Уайт, Нуну Тавареш, Сака (Пепе, 85), Смит-Роу (Колашинац, 90), Парти, Локонга, Ляказетт (Эдегор, 58), Обамеянг.
Огоҳлантиришлар: Эванс (68), Варди (75).

Шерзод Нурматов таржимаси

Дарвозабон Рэмсдейл — "Арсенал" янги лидери