Ўйин ҳақида

"Бугунги ўйин қўқонлик мухлисларимиз учун совға бўлди. Учрашув қизиқарли руҳда ўтиши олдиндан маълум эди, чунки Кападзе бошчилигидаги "Олимпик" шаклланиб улгурган жамоа ҳисобланади. Биз бу жамоанинг "Сурхон"га қарши ўйинини таҳлил қилгандик. Бу жамоани ёш деб айтиб бўлмайди, уларда катта ёшли футболчилардан тажриба жиҳатдан бироз фарқ сезилиши мумкин, бироқ бошқа жабҳаларда улардан қолишгани йўқ. Бугунги ўйинда ҳам клуб тенгма-тенг кураш олиб борди. Шу боис, "Олимпик"га омад тилайман.

Биз режа асосида ўйинга пухта тайёргарлик кўрдик. "Нефтчи"га қарши ўйинда содир этган хатоларимиз устида ишладик. Жамоа бош мураббийи Бахтиёр Ашурматовнинг икки ўйинга дисквалификация қилинганини учрашувдан аввал эшитдик, сабаби менга номаълум. Ушбу ғалабани Бахтиёр Аъзамовичга ҳам бағишлаймиз.

Ҳужумчилар тўғрисида

Таркибимиздан келиб чиққан ҳолда, қишки ўқув йиғинларда ҳам битта ҳужумчи билан ўйнашни режалаштиргандик. Сўнгги икки баҳсда ҳам бир ҳужумчини майдонга туширдик, керакли вазиятда иккинчи ҳужумчини ўйинга қўшяпмиз. Балки келгуси ўйинларда икки ҳужумчи билан ҳаракат қилармиз, бу жарайн бош мураббий кўрсатмасига биноан амалга оширилади. Бизнинг вазифамиз унинг кўрсатмаларини бажара олиш.

Дисквалификация ҳақида

Бахтиёр Аъзамович ўйиндан аввал жуда асабийлашди. Майдонга етиб келгач, бу хабарни эшитдик, мураббий эса бундан ғазабланди. Шундай жазо қўллар экан, вақтлироқ огоҳлантирилганда, мақсадга мувофиқ бўларди. Нима сабаб экани бизга қоронғи. Бу масалага эртага аниқлик киритилади.

Ҳамидулла Абдуҳамидов ҳақида

Ҳамидулла Абдуҳамидов биринчи даврада бизга ёрдам бера олмайди, у иккинчи даврада сафимизга қўшилади. Биз унга катта умид боғлаганмиз. Жароҳатлар футболнинг бир бўлаги ҳисобланади. Ҳамидулла ҳамиша биз билан бирга. Худо хоҳласа, унинг сафга қўшилиши билан жамоамиз янада кучаяди.

Захирадан майдонга тушган Анвар Хожимирзаевнинг яна захирага олингани ҳақида

Анвар Хожимирзаевни тактик ўзгариш қилиш натижасида яна захирага олдик. Унда ҳеч қандай жароҳат йўқ. Биз бир оиламиз, ҳамма бир-бирини тўғри тушунади.

Мухлисларга тилаклар

Мухлисларимиз ҳар доим бизни қўллаб-қувватлашмоқда. Улар соғ-саломат бўлишсин. Улар бизнинг бир бўлагимиз. Ўтган ўйиндаги мағлубиятда улар олдида хижолатмиз. Футбол мухлислар учун ўйналади. Ғалабамизда уларнинг ҳиссаси беқиёс.

Даврон Файзиев: "Ашурматов дисквалификация қилинганини ўйиндан аввал билдик. Бундай огоҳлантиришларни эртароқ айтиш керак"