- Йигитлардан миннатдорман. Бунчалик кўп гол урамиз деб ўйламагандим. Бу ўйин орқали биз тўғри йўлда эканлигимизни ҳис қилдим. Аммо ҳали анчагина ишлаш керак. Натижа адолатли бўлди, биринчи бўлимни зўр ўтказдик. Қисқа давр ичида тўртта гол уриб олдик. Тайм якунида эса гол қўйиб юбордик. Бу нима билан боғлиқлигини ҳали кўриб чиқамиз. Иккинчи бўлим бошида эса бизда етарлича вазиятлар бўлди. Улардан фойдаланиб олиб, бундай асабий якунга йўл қўймаслик керак эди. Яна бир бор барчани ғалаба билан табриклайман, клубда ишлаётганлар, биз билан ким бир сафда бўлса, ғалаба барчаники. Бу муваффақият рухий нуқтаи назардан ҳам муҳим эди. Энди чемпионат ўйинига тайёрланиб, турнир жадвалидаги ҳолатни яхшилашга интилишимиз керак.

- Бугунги ўйинда алмаштиришлар ўзини оқламагандек кўринди. Билолхон Тошмирзаевнинг захирага олиниши, ўйин темпини туширгандек бўлди.

- Бундай деб ўйламайман. Тошмирзаев кичик жароҳат орттириб олгани учун алмаштирилди. Биринчи бўлимнинг ўзида бир қанча алмаштиришларни режалаштириб қўйгандик. Таркибда сифатли футболчилар кўп, уларга ўзларини кўрсатиши учун имконият бериш керак. Бу ерда ким яхши ўйнади ёки ёмон ўйнади деб ўтирмайман. Барча футболчилар майдонга чиқди ва ҳаракат қилди. Ҳа, нимадир ўхшади, нимадир йўқ. Буни ўзаро гаплашиб оламиз.

- Ҳумоюн Муртазоев бугун нега ўйнамади?

- Таркибимизда ҳужумчилар етарлича. Айтганимдек, барчага имконият берилиши керак. Муртазоев 4 кун олдин ўйинда қатнашди. Шу сабабли унга дам бердик. Шанба куни навбатдаги ўйинимизни ўтказамиз. Шу сабабли ҳозир футболчиларнинг кучини тежаш ва тиклаш ҳам керак. Навбатдаги ўйинга эса кимнинг қандай ҳолатда эканлигига қараб тайёрланамиз. Олдимиздаги ўйин ҳам қийин ва голларга бой ўтиши мумкин.

Денис Бушуев: "Бунчалик кўп гол урамиз деб ўйламагандим"