Қизиқарли кечган баҳсда Мадибек Бадалов бошчилигидаги "Денов" футбол клуби ғалаба қозониб, вилоят кубогини қўлга киритди. Ушбу баҳсни Республика тоифасидаги ҳакам Рустам Чориев бошқариб борди. Биз турнир ҳақидаги фикрлари ва таассуротларини билиш мақсадида жамоа мураббийига юзландик.

"Санжар Шомуродов вилоят футбол ассоциациясига келгач футболга бўлган қизиқиш уйғонди. Футболни юксалтиришга ҳаракат бўляпти. Худо хоҳласа "Денов" жамоасини биринчи Б лигага олиб чиқиш ниятимиз бор. Проффессионал жамоа сифатида тарбияланувчиларимиз билан олдинга интилмоқчимиз. Ташкилий ишлар, ҳакамлик ва бошқа жиҳатларга эътироз йўқ. Айтганимдек Санжар Шомуродов келгач ижобий томонга силжиш бўлмоқда.

Фақат туман ҳокимлиги томонидан кўмак берилмаяпти. Шунга қарамасдан тадбиркорлар, укаларимиз қараб туришгани йўқ, ёрдам беришяпти. Энди яқин кунларда янги ҳоким тайинланса бафуржа ўтириб гаплашиб олишни режа қилганмиз. Муҳими озгина бўлсада эътибор қаратилиши.

Денов халқи футболни севадиган халқ ҳисобланади. Лекин катта футбол йўқ. Ишонсангиз авваллари стадионлар тўлиб кетар эди. Бу халқнинг футболга бўлган қизиқиши ва меҳридан далолат беради. Бироқ мухлислар учун маданий ҳордиқ чиқарадиган жой йўқ, футбол ишқибозларига бунда стадион асқотади. 2021 йилда стадионимизни қайта реконструкция қилиш ва биринчи лига учун ўн минг ўриндиқли стадион қуриш режалаштирилган",- дейди Мадибек Бадалов.

Қуйида ушбу учрашувдан олинган фотолавҳаларни томоша қилинг.

"Денов" футбол жамоаси Сурхондарё вилояти кубогини қўлга киритди