Учрашувни ҳар иккала жамоа ҳужумкор тарзда бошлашди. Меҳмонларнинг 12-дақиқада бошлаган ҳужумларини Ҳусанжон Ғаниев самарали тарзда якунлади ва жамоасини ҳисобда олдинга олиб чиқди.

Шундан сўнг мезбонлар олдинга интилишди. Алишер Юсупов ҳамда Дилшод Хушбаковда гол уриш учун ажойиб имкониятлар бўлганди. Бироқ наманганликлар посбони Нодир Ашурматов биринчи бўлимда ўз постини жуда ишончли тарзда қўриқлади ва жамоалар танаффусга 0:1 ҳисоби билан йўл олишди.

Таблодаги ҳисоб мезбонларни қониқтирмагани боис иккинчи таймни ёш "аждарлар" анча ҳужумкор руҳда бошлашди. Учрашувнинг 53-дақиқасида "Навбаҳор" жамоаси дарвозаси томон белгиланган 11-метрлик жарима зарбасини Дилшод Хушбаков самарали якунлади ва орадаги фарқни йўққа чиқарди. Бу гол "Насаф" ҳужумчисининг ўйиндаги дастлабки голи эди. Бундан сўнг Дилшод Хушбаков 75 ва 77-дақиқаларда ҳам муваффақият қозонди. Дастлаб Хушбаков жарима майдончасига яқинлашиб келиб узоқдан тўпни дарвозанинг пастки чап бурчагига йўллаган бўлса, орадан икки дақиқа ўтиб ҳужумчимиз чап қанотдан бошланган ҳужумни боши билан самарали якунлади ва учрашувда хет-трик қайд этди.

Ўйин тугашига 9 дақиқа вақт қолганида, аниқроғи 81-дақиқада Ислом Кенжабоев ҳам жарима майдончаси ичига ёриб кириб, дарвозани аниқ нишонга олди ва беллашувдаги якуний ҳисобни ўрнатди, 4:1.

Шундай қилиб, "Насаф" ёшлари "Навбаҳор" жамоасини ўз майдонларида йирик ҳисобда таслим этишди ва муҳим ғалабани қўлга киритишди.

Ёшлар лигаси, 23-тур.

“Насаф” – “Навбаҳор” 4:1 (0:1)

Қарши шаҳри. “Меҳнатчи” стадиони.

Ҳакамлар: Даулетбай Жалимов (Нукус), Артём Калинин (Қарши), Зуфар Элибоев (Қарши), Равшан Абдувоҳидов (Қарши).

Назоратчи: И.Мустафин (Тошкент).

“Насаф”: 1.Алибек Туробов (12.Умиджон Эргашев, 83), 2.Ғолиб Ғайбуллаев (9.Самандар Шукруллаев, 83), 4.Сардор Саъдуллаев (14.Дониёржон Нарзуллаев, 66), 7.Акбар Муродов, 8.Сирожиддин Қўзиев, 10.Ислом Рашидхонов (14.Ойбек Ҳамидов, 82), 11.Дилшод Хушбаков, 17.Достонбек Бердиқулов (5.Шаҳриёр Имомхўжаев, 82), 22.Ислом Кенжабоев (55.Жаҳонгир Қурбонбоев, 81), 28.Алишер Юсупов (20.Наврўзжон Иззатиллаев, 67), 33.Ботиржон Тўраев.

“Навбаҳор”: 32.Нодир Ашурматов, 2.Азизжон Умаров, 4.Омон-бийк Халилов, 6.Акбарали Холдоров, 8.Билол Шарофетдинов, 9.Дониёр Инамов (19.Аҳаджон Турғунпўлатов, 83), 10.Азизбек Турғунбаев, 11.Ҳусанхон Ғаниев (23.Фарруҳ Умаралиев, 76), 17.Иброҳим Исмоилов (16.Жавоҳир Олимжонов, 80), 20.Муҳаммаджон Расулов, 22.Санжар Тошпўлатов.

Захира: 87.Акмал Ортиқов.

Голлар: Дилшод Хушбаков (53-пен, 75, 77) И.Кенжабаев (81) - Ҳусанжон Ғаниев (12).

Огоҳлантиришлар: А.Муродов (44), Б. Тўраев (55) Ш. Имомхўжаев (83)

Дилшод Хушбаковнинг бенефиси