Азалий рақиб саналмиш “Динамо” ва “Андижон” жамоалари ўзаро майдонга тушишади.

БИР ХИЛ МАҚСАД, ИККИ ХИЛ ВАЗИЯТ...

Суперлигани мақсад қилган ушбу икки клуб айни дамда икки хил вазиятда. Про-Лига “А” гуруҳида “Динамо” 7 ўйиндан кейин ҳозирча ғалаба нималигини билмай, 9-поғонадан жой олган бўлса, “Андижон” 15 очко билан 2-поғонадан жой олган.

Ушбу баҳсдаги уч очко “Динамо”га 1-даврани ғалаба билан якунлаш имконини берса, “Андижон”га пешқадамликни тақдим этиши мумкин.

ЎЙИННИ КИМ БОШҚАРАДИ?
Ушбу учрашувни бошқариб бориш ёш ҳакамлардан бири Жасур Мухторовга ишониб топширилган. Баҳс назоратчиси эса тажрибали Фарҳод Абдуллаев.

Про-Лига. “А” гуруҳи.
9-тур. 14 май (душанба)
“Динамо” – “Андижон”
Бош ҳакам: Жасур Мухторов.
Қанот ҳакамлари: Равил Шояхметов, Сервер Еремеев.
Назоратчи: Фарҳод Абдуллаев.
Ўйин бошланиш вақти: 18:00.

ЎЗАРО ЎЙИНЛАР: УСТУНЛИК «ДИНАМО»ДА
Статистикага назар ташлар эканмиз, “Динамо” ва “Андижон” чемпионат доирасида 40 марта ўзаро тўқнаш келишган. Ушбу ўйинлардан 18 тасида “Динамо” “Андижон”ни мағлуб эта олган. 14 ўйинда эса андижонликлар ғолиб бўлишган. 8 та ўйинда эса томонлар муроса кўчасини танлашган.

ОЧКОЛАР…
“Динамо” шу кунгача ўзаро ўйинларда “Андижон” дарвозасига 62 та гол киритган. “Андижон”нинг голлари эса 51 та. “Бургутлар” ўзаро ўйинларда 50 очко ишлаб олишган бўлса, “Арслонлар” 62 очкони қўлга кирита олишган.

ЭНГ ЙИРИК ҲИСОБ…
“Динамо”нинг “Андижон” устидан эришган энг йирик ғалабаси 6:1ни ташкил қилади. Ўшанда самарқандликлар сафида Ҳамдам Раҳмонов захирадан майдонга тушиб, 5 та гол муаллифига айланган. Бу чемпионатдаги рекорд натижадир.

“Андижон”нинг “Динамо” устидан қозонган энг йирик ҳисобдаги ғалабаси эса – 4:1га тенг.

Самарқандда ўтган сўнгги 5 учрашув:
26.06.2015 «Динамо» - «Андижон» 2:1
27.08.2014 «Динамо» - «Андижон» 2:0
19.10.2012 «Динамо» - «Андижон» 3:0
21.05.2011 «Динамо» - «Андижон» 3:1
27.05.2010 «Динамо» - «Андижон» 2:0

«Динамо» 1993 йилдан буён Самарқандда «Андижон»га мағлуб бўлмаган. Кўрамиз, анъана бу сафар ҳам давом этармикан...

БИЛАСИЗМИ...

“Динамо” Самарқандда ўтган ўзаро 19 та ўйиннинг 13 тасида ғалаба қозонган. 5 та учрашувда дуранг қайд этилган.

“Андижон” ўз тарихида бир маротиба - 1993 йилда Самрқанддан ғалаба билан қайтган. Шундан кейин бўлиб ўтган 18 ўйинда “Динамо” ўз майдонида бу рақибга умуман мағлуб бўлмаган.

"Динамо" - "Андижон": Анъана давом этадими?