Жумладан, жамоанинг тажрибали ҳимоячиси, бутун мавсум давомида ёшларга ўрнак бўла олган Алексей Николаев клуб томонидан «Йилнинг энг яхши футболчиси» деб топилди. Футболчига совринни Самарқанд вилоят Футбол Федерацияси вице-президенти Шуҳрат Сайфуллаев топширди.

Биринчи Лигада энг кўп ўйин ўтказиб, энг кам гол (19) ўтказган Михаил Наумов «Энг яхши дарвозабон» деб эътироф этилди. Моҳир посбонга фахрий ёрлиқ ҳамда эсдалик совғани Самарқанд вилоят «Динамо» Спорт Жамияти раиси Сервер Осмонов топширди.

«Динамо» жамоасининг 21 ёшли ҳужумчиси Амиржон Сафаров жорий мавсумда мавсумнинг кашфиётларидан бири бўлди. Сафаров чемпионат давомида «Динамо»нинг ғалабаларига катта ҳисса қўшиб, 23 та гол билан тўпурарлар рўйхатида етакчилардан бири бўлди. Айнан шу боис, у «Динамо»нинг 2016 йилдаги «энг яхши тўпурари» фахрий ёрлиғи ҳамда соврини билан тақдирланди. Унга совғани «Бунёдкор» ҳужумчиси Баҳодир Насимов топширди.

2016 йилги мавсум давомида «Динамо» жамоасини хоҳ уйдаги, хоҳ сафардаги ўйинларида ашаддий мухлис Шавкат Бурҳонов севимли жамоасини қизғин қўллаб-қувватлаб, мухлисларга ўрнак бўла олди. Фидойиликка жавобан ашаддий ишқибоз «Динамо» клуби томонидан «Йилнинг энг жонкуяр мухлиси» деб топилиб, фахрий ёрлиқ ва «Динамо» клуби футболчилари дастхати туширилган тўп билан тақдирланди.

«Динамо» клуби матбуот хизмати.

"Динамо": Энг яхшилар тақдирланди