Ушбу йиғилиш Самарқанд вилоят футбол Федерацияси, «Динамо» ПФК раҳбарияти, мураббийлар ва футболчилар иштирокида бўлиб ўтди.

Ушбу тадбирдан асосий мақсад клуб ва мухлислар ўртасида янада яқин алоқалар ўрнатиб, мавжуд муаммоларни бирга бартараф этиш, уй стадионда бўлгани каби меҳмондаги ўйингоҳларда ҳам мухлислик маданиятини юксалтириш борасида бўлди. Шунингдек, тадбирда иштирок этган 50 нафарга яқин ишқибозлар бош мураббий Баҳром Ҳакимов ва бир қатор футболчиларга ўзларини қизиқтирган саволлари билан мурожаат этишди.

«Авваламбор, жамоамизни нафақат Самарқанддаги баҳсларда балки сафар учрашувларида ҳам тинмай қўллаб-қувватлаётган мухлисларимизга миннатдорчилигимизни билдирамиз. Улар ҳар қандай ҳолатда ҳам жамоа руҳини кўтаришга интилишмоқда. Аммо аксарият ҳолатларда айрим мухлислар сафардаги ўйинларимиздан норози бўлишмоқда. Уларни тушунаман, аммо улар ҳам жамоа таркиби қисқа фурсат ичида шаклланиб қолмаслигини тушунишлари лозим. Чиндан ҳам олдинда жамоамизни жуда қийин учрашувлар кутиб турибди. Ишонаманки, биз бу синовлардан муваффақиятли ўтамиз» - дейди Баҳром Ҳакимов.

Бу борада клуб раҳбарияти, футболчилар ва мухлислар ҳам чиқиш қилиб, жамоага ишонишларини таъкидлашди.

Қайд этиш лозимки, бундай учрашувлар тобора анъана тусига кирмоқда. Жорий мавсум аввалида ҳам икки маротаба мана шундай учрашув ташкил этилган эди.

«Динамо» клуби мухлислар билан учрашди